ޖުވެނައިލް ކޯޓުގެ ގޯތިތެރޭގައި ހުރި އަނބު ގަހަކުން އަނބު ބިން މައްސަލައެއްގައި މީހަކު ހައްޔަރުކޮށްފިއެވެ. މި މައްސަލައިގައި ހައްޔަރުކުރި މީހާއަކީ ލ. ގަމަށް ނިސްބަތްވާ 42 އަހަރުގެ މީހެކެވެ.
ބަންދު އަމުރުގައިވާ ގޮތުން، މި މީހާ ވަނީ ޖުވެނައިލް ކޯޓުގެ ފާރުމައްޗަށް އަރައި، އެތަނުގައި ހުރި އަނބު ގަހުން އަނބު ބިންނަން އުޅެނިކޮށް ސެކިއުރިޓީންނަށް ފެނިގެން، އަދި އެކަން ތަކުރާރު ނުކުރުމަށާއި، އަނބުތައް ބަހައްޓާފައި ދިއުމަށް ސެކިއުރިޓީން އެންގުމުން، އެތަނުން ދާން އުޅެނިކޮށް ފުލުހުން ވަނީ އޭނާ ހުއްޓުވައިގެން ހައްޔަރަށް ގެންގޮސްފައެވެ.
މި މީހާއަކީ އެކި މައްސަލަތަކުގައި މީގެ ކުރިން 63 ފަހަރު ހައްޔަރުކޮށްފައިވާ މީހެކެވެ. އޭގެ ތެރެއިން 30 ފަހަރު ބަންދުގެ މުއްދަތު ޖަހާފައިވާއިރު، އޭނާ އެންމެ ގިނައިން ހައްޔަރުކޮށްފައިވަނީ ވައްކަމުގެ މައްސަލަތަކުގައެވެ.
މި މައްސަލައިގައި ކޯޓުން ވަނީ އޭނާގެ ބަންދުގެ މުއްދަތުގެ ގޮތުގައި ހަތް ދުވަސް ކަނޑައަޅާފައެވެ.