ޖަމްޢިއްޔާތައް މާލީގޮތުން ބާރުވެރި ކުރުވުމަށް ކުރާ މަސައްކަތުގެ ދަށުން މިއަހަރުވެސް ޖަމްޢިއްޔާތަކަށް ދައުލަތުގެ ބަޖެޓުން ފައިސާ ދޫކުރުމަށް، ޒުވާނުން ބާރުވެރިކުރުމާއި ފަންނިއްޔާތާބެހޭ ވުޒާރާއިން ނިންމައިފިއެވެ.
ޖަމިއްޔާތަކުގެ ރަޖިސްޓްރަރ އަލީ ޝަކީލް ވިދާޅުވި ގޮތުގައި، މި ގްރާންޓަށް އެދުމުގެ ފުރުޞަތު ހުޅުވާލެވޭނީ މިމަހުގެ ތެރޭގައެވެ. އަދި މިފަހަރުގެ އުޞޫލަށް ބައެއް ބަދަލުތަކެއް އަންނާނެ ކަމަށާއި، އެއީ ރަނގަޅު ބަދަލުތަކެއް ކަމުގައިވެސް އޭނާ ފާހަގަކުރެއްވިއެވެ.
“އަޅުގަނޑުމެންވެސް ބޭނުންވޭ ރާއްޖޭގެ ގިނަ ޖަމިއްޔާތަކުން ގިނަ ކަންތައްތަކެއް ކުރަން. ގްރާންޓް ދިނުމުގައި ވަރަށް ވިސްނުން ހުރޭ މެންޑޭޓާ ގުޅޭ ގިނަ ކަންތައްތަކަކަށް އިސްކަންދޭން،” ޝަކީލް ވިދާޅުވިއެވެ.
މި އެހީތެރިކަމަކީ އިޖުތިމާޢީ ގޮތުން މުޖުތަމަޢު ބާރުވެރިކުރުވުމަށް ހިންގާ އެކި މަޝްރޫޢުތަކަށް ދެވޭ އެހީއެކެވެ. މިގޮތުން މިދިޔަ އަހަރު ވަނީ 15 ޖަމްޢިއްޔާއަކަށް މާލީ އެހީތެރިކަން ފޯރުކޮށްދީފައެވެ. މި ފައިސާ ދޫކުރެވެނީ ތިން މަރުހަލާއަކަށް ބަހާލައިގެންނެވެ.
ފާހަގަކޮށްލެވޭ ކަމަކީ، ރާއްޖޭގައި 3000 އެއްހާ ޖަމްޢިއްޔާ ރަޖިސްޓްރީކޮށްފައިވީ ނަމަވެސް، އޭގެ ތެރެއިން ހަރަކާތްތެރިވަނީ ހާހެއްހާ ޖަމްޢިއްޔާއެވެ. މިކަމާ ގުޅިގެން ޒުވާނުން ބާރުވެރިކުރުމާބެހޭ ވުޒާރާއިން ވަނީ ޖަމްޢިއްޔާތައް އަދާހަމަކުރުމުގެ މަސައްކަތް ފަށައި، މިއަހަރުގެ ނިޔަލަށް ހަރަކާތްތެރިނުވާ ޖަމްޢިއްޔާތައް އުވާލުމަށް ނިންމާފައެވެ.