މުޅި ދުނިޔެއިން އެއްވަނަ ހޯދި ގއ. އަތޮޅު ތަޢުލީމީ މަރުކަޒުގެ ދެ ދަރިވަރުން، ޒޭބާއާއި މާވިޝް ކެމްބްރިޖް ލާނަރސް އެވޯޑުގެ ފަޚުރާއެކު ގއ އަތޮޅު ތައުލީމީ މަރުކަޒުގެ ނަން ރޯޝަން ކޮށްދީފި އެވެ.
ގއ. އަތޮޅު ތަޢުލީމީ މަރުކަޒުގެ ދެ ދަރިވަރުން، ފާޠިމަތު މާވިޝް މުޙައްމަދު އާއި އާމިނަތު ޒޭބާ އަބްދުﷲ، ވަނީ 2024 ވަނަ އަހަރުގެ އޯލެވެލް އިމްތިހާނުގައި ސެކަންޑް ލޭންގުއޭޖްގެ ގޮތުގައި އިނގިރޭސި މާއްދާއިން ދުނިޔެއިން އެއްވަނަ ހޯދުމާއެކު ކެމްބްރިޖް ލާނަރސް އެވޯޑް ހާސިލުކޮށްގެން މުޅި ރަށާއި އަތޮޅުގެ ނަން، ހާއްސަކޮށް ގއ އަތޮޅު ތައުލީމީ މަރުކަޒުގެ ނަން، އިލްމީ އުދަރެހުގައި ރަންއަކުރުން ފަވާލަދީފައެވެ.
މި ދެ ދަރިވަރުން ވަނީ އިނގިރޭސި މާއްދާއިން ރާއްޖެއިން ވެސް އެއްވަނަ ހޯދާފައެވެ.
އޯލެވެލް އިމްތިޙާނުގައި ޒޭބާއަށް ލިބުނީ ތިންވަނައެވެ. އަދި މާވިޝްއަށް ލިބުނީ 10ވަނައެވެ. މި ފާހަގަކޮށްލެވޭ ކާމިޔާބީ ހޯދުމުގައި އެންމެ އިސްދައުރެއް އަދާކުރެއްވީ އިނގިރޭސި ޓީޗަރު ސަތީޝް ކަމަށް ގއ. އެއީސީން ބުނެފައިވެއެވެ.
މި ކާމިޔާބީއާ ގުޅިގެން ގއ. އެއީސީން ވަނީ ލީޑިންގ ޓީޗަރ އިބްރާހީމް ވަޙީދުގެ ފަރާތުން ލިބެމުންދާ އެއްބާރުލުމާއި ލީޑަރޝިޕަށާއި، ބެލެނިވެރިންގެ ހިތްވަރާއި، ދަރިންގެ ތަޢުލީމަށް ދެއްވާ އަހައްމިއްޔަތުކަމަށްޓަކައި އިޚްލާޞްތެރިކަމާއެކު ޝުކުރު ދަންނަވާފައެވެ. އަދި ކުރިއަށް އޮތްތަނުގައި ވެސް ދަރިވަރުން ކުރާ މަސައްކަތުގައި ކާމިޔާބީ އަށް އެދޭ ކަމަށް ބުނެފައިވެއެވެ.
މި ކާމިޔާބީއަކީ ދިވެހި ތަޢުލީމީ ދާއިރާއަށް ލިބުނު ވަރަށް ބޮޑު ފަޚުރެކެވެ. އަދި މި ކާމިޔާބީން ދައްކުވައިދެނީ ދިވެހި ދަރިވަރުންނަށް ބައިނަލްއަޤްވާމީ ފެންވަރުގައި ވާދަކޮށް، އެންމެ މަތީ ވަނަތައް ހޯދުމުގެ ޤާބިލުކަން ލިބިފައިވާކަމެވެ.
ހުވަދޫ މީޑިއާ އިން މިދެދަރިވަރުންނަށާއި އަދި ގއ އޭސީސީ އަށްވެސް ނުހަނު ހޫނު އަދި އުފާވެރި މަރުހަބާއެއް ދަންނަވަމެވެ. އަދި އެދެނީ މި ކުދިން ކުރިމަގުގައިވެސް، އަބަދުވެސް ފަހިކަމާއެކު ފާގަތިކަން މަތީ ކާމިޔާބުވަމުން ދިއުމެވެ.