ޤައުމެއްގައި އުފާވެރިކަން އަށަގަތުމަށް އެބައެއްގެ މާދަރީ ބަހާއި ސަޤާފަތާއި ތަރިކައާއި ފަންނު މުހިންމު ދައުރެއް އަދާކުރާ ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ވިދާޅުވެއްޖެއެވެ. އެކަމަނާ މިހެން ވިދާޅުވީ މިއަދު ބޭއްވުނު ދިވެހިންގެ އުފާވެރިކަމުގެ މިންގަނޑު އިފްތިތާޙްކުރުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
މި ރަސްމިއްޔާތުގައި ސާޖިދާ ވަނީ “އުފާވެރި ރާއްޖެ” ލޯގޯ އިފްތިތާޙްކޮށްދެއްވާފައެވެ. އަދި މިއީ ރާއްޖޭގެ ޤައުމީ ހަޔާތުގައި ފުރަތަމަ ފަހަރަށް ދިވެހި ޤައުމުގެ އުފާވެރިކަމުގެ ނިސްބަތް ދެނެގަތުމުގެ މަޝްރޫޢު ފެށޭ ދުވަސްކަން ފާހަގަކުރައްވައި، މިއީ ޤައުމަށް ލިބިގެންދާ ބޮޑު އުފަލެއްކަމަށް ވިދާޅުވިއެވެ.
ސާޖިދާގެ ވާހަކަފުޅުގައި އުފާވެރިކަން އެކި މީހުން މާނަކުރާ ގޮތަށްވެސް އަލިއަޅުވާލެއްވިއެވެ. އެކަމަނާ ވިދާޅުވީ ޢިލްމީ ގޮތުންނާއި ބަހުގެ ގޮތުން އުފާވެރިކަން މާނަކުރާގޮތް ތަފާތުކަމަށެވެ. އަދި ޤައުމެއްގައި އުފާވެރިކަން އަށަގެންނެވުމަށް ބަހާއި ސަޤާފަތާއި، ތަރިކައާއި ފަންނުވަރަށް މުހިންމު ދައުރެއް އަދާކުރާކަމަށް ފާހަގަކުރެއްވިއެވެ.
“ޒަމާނުއްސުރެ އެބައެއްގެ މާދަރީ ބަހުން ހެދިފައި ހުންނަ ކިޔާފައި ހުންނަ ޖޯކުތަކާއި، އުފަންވެފައި ހުންނަ ބުއްދިވެރި ބުނުންތަކާއި ވާހަކަތަކާއި މިނޫންވެސ މިނޫންވެސް އަދަބީ އުފެއްދުންތަކުން އުފާވެރިކަން ލިބިގަތުމަކީ ދުނިޔޭގެ ޤައުމުތަކުން ވަރަށް ފުޅާދާއިރާއެއްގައި ބަލައިގަންނަ ކަމެއް،” މެޑަމް ސާޖިދާ
އިންސާނާއަށް އުފާވެރިކަން ލިބޭ ސަބަބުތަކުގެ ތެރޭގައި މާލީ ފުދުންތެރިކަމާއި، ނަފްސާނީ ހަމަޖެހުމާއި، ރޫހާނީ މުއްސަނދިކަމާއި، ސިއްޙީ ދުޅަހެޔޮކަން، އިޖްތިމާޢީ ފުދުންތެރިކަމާއި ތަރިކައާއި ސަގާފަތުން ދޭ ހިތްފަސޭހަކަން ހިމެނޭކަމަށް އެކަމަނާ ވިދާޅުވިއެވެ. އަދި އިސްލާމްދީނުގައި ހަޤީޤީ އުފާވެރިކަން ލިބެނީ މާތްﷲ ހަނދުމަކުރުމުންނާއި ހެޔޮމިންވަރާއި ނުބައި މިންވަރަށް އީމާންވުމުން ކަމަށްވެސް ފާހަގަކުރެއްވިއެވެ.
ދިވެހިންގެ އުފާވެރިކަމުފާވެރިކަމުގެ މިންގަނޑު އެކުލަވާލުމުގެ މަސައްކަތް ފަށާފައިވާއިރު، މި މިންގަނޑު އެކުލަވާލުމަށް ދިރާސީ މަސައްކަތް ކުރާނީ އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫއެމް) އިންނެވެ. މި ދިރާސާގައި މުޖުތަމަޢުގެ ހުރިހާ ފަންތިއެއްގެ މީހުންގެ ބައިވެރިވުން ހިމެނޭނެ ކަމަށް އައިޔޫއެމުން މަޢުލޫމާތު ދެއްވާފައިވެއެވެ.
މި ރަސްމިއްޔާތަކީ ދިވެހިރާއްޖޭގެ ތާރީޚުގައި ފުރަތަމަ ފަހަރަށް ޤައުމީ ފެންވަރުގައި އުފާވެރިކަމުގެ މިންގަނޑެއް ތަޢާރަފުކުރުމަށް ބޭއްވުނު ރަސްމިއްޔާތެކެވެ. މި މަޝްރޫޢުގެ މަޤްޞަދަކީ ދިވެހި ރައްޔިތުންގެ އުފާވެރިކަމުގެ މިންވަރު ދެނެގަނެ، އެކަން އިތުރުކުރުމަށް ކުރެވިދާނެ ކަންކަން ދެނެގަތުމެވެ.