މާލޭގެ މަގެއްގައި މަރުވެފައި އޮތް ބުޅަލެއް، އޯގާތެރިކަމާއެކު ނަގައިގެން ގޮސް ވަޅުލި 2 ފުލުހުންނަށް އާންމުން ތަޢުރީފު ކޮށްފިއެވެ.
ސޯޝަލް މީޑިއާގައި މި މަންޒަރު ފެންނަ ފޮޓޯއަކާއެކު އާންމު ރައްޔިތެއް ހިއްސާކޮށްފައިވާ ޕޯސްޓެއްގައި އެ ފުލުސް އޮފިސަރުންނަށް ތަޢުރީފު ކޮށްފައިވެއެވެ. އަދި މިއީ ހަގީގީ ފުލުސް އޮފިސަރުން ކަމަށް ވެސް އެ ފަރާތުން ޕޯސްޓުގައި ބުނެފައިވެއެވެ.
ޕޯސްޓުގައި ހާމަކޮށްފައިވަނީ، މި ހާދިސާ ހިނގީ އިއްޔެ ހެނދުނު 11:20 އެހާކަންހާއިރުކަމަށެވެ. އަދި ހާދިސާ ހިނގާފައިވަނީ ރަސްފަންނު ސަރަހައްދުގައި ކަމަށްވެސް ބުނެފައިވެއެވެ.
މި ފަރާތުގެ ޕޯސްޓު ސޯޝަލް މީޑިއާގައި ހިއްސާކޮށް، މާލެ ސިޓީ ފުލުހުން އެ އަމަލުގައި ޝާމިލްވި 2 ފުލުހުންނަށް ޝުކުރު އަދާކޮށްފައިވެއެވެ. އަދި މިފަދަ ޢަމަލުތައް ކިތަންމެ ކުޑަހެން ހީވިޔަސް މިއީ ކޮމިއުނިޓީ ޕޮލިސިންގެ ހަގީގީ ރޫހު ދައްކަވައިދޭ ޢަމަލެއް ކަމަށް ހާމަކޮށްފައިވެއެވެ.