ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މިއަދު ފާހަގަކުރާ ދުނިޔޭގެ ކެންސަރު ބަލީގެ ދުވަހާ ގުޅިގެން ދުންފަތުގެ އިސްތިޢުމާލުން ދުރުހެލިވުމަށް އިލްތިމާސްކުރައްވައިފިއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ރައީސް ޑރ މުއިއްޒު ވިދާޅުވީ، ކެންސަރު ބަލި ޖެހުމަށް އެންމެ ބޮޑަށް މަގުފަހިކުރުވަނީ ދުންފަތުގެ އިސްތިޢުމާލު ކުރުމުން ކަމަށެވެ. އެހެންކަމުން ކެންސަރު ބަލިން ރައްކާތެރިވުމަށާއި، ދުރާލާ ބަލި ދެނެގަތުމަށާއި، ހަމަހަމަކަމާއެކު ފަރުވާ ފޯރުކޮށްދިނުމަށް އަމާޒު ހިފާފައިވާކަން ފާހަގަކުރެއްވިއެވެ.
އަދި ރައީސް ޑރ މުއިއްޒުގެ މެސެޖުގައި، ގުޅިގެންކުރާ މަސައްކަތްތަކާއެކު ތިން ކަމެއް ކުރުމަށް އަމާޒު ހިފާފައިވާކަން ފާހަގަކުރައްވައި ވިދާޅުވީ ކެންސަރު ބަލިން ރައްކާތެރިކަން ކަށަވަރުކުރުމާއި ދުރާލާ ކެންސަރު ހުންނަކަން ދެނެގަނެ އަވަސް ފަރުވާ ޔަޤީންކުރުމާއި ކޮންމެ މީހަކަށްވެސް ހަމަހަމަކަންމަތީ ފަރުވާ ދެވޭކަން ކަށަވަރުކުރުން ހިމެނޭ ކަމަށެވެ.
ދިވެހިންނަކީ ދުންފަތުން ދުރުހެލިވެފައިވާ ބަޔަކަށް ހެދުމަށް ސަރުކާރުން ގިނަ ފިޔަވަޅުތަކެއް އަޅުއްވާފައިވެއެވެ. މީގެ ތެރޭގައި ދުންފަތް ކޮންޓްރޯލްކުރުމާ ބެހޭ ޤާނޫނަށް މުހނޫނަށް މުހިންމު އިސްލާޙުތަކެއް ގެނައުން ހިމެނެއެވެ. މި އިސްލާޙުތަކުގެ ދަށުން:
- ދުންފަތުގެ އެއްވެސް ބާވަތެއް ރާއްޖެ އެތެރެކުރުން މަނާކުރެވުނެވެ.
- ދުންފަތުގެ އެއްވެސް ބާވަތެއް ރާއްޖޭގައި އުފެއްދުން މަނާކުރެވުނެވެ.
- ސިނގިރޭޓުން ނަގާ ޑިޔުޓީ ބޮޑުކުރެވުނެވެ.
- ވޭޕް ބޭނުންކުރުން މަނާކުރެވުނެވެ.
މި ފިޔަވަޅުތަކަކީ ކެންސަރުފަދަ ނުރައްކާތެރި ބަލިތަކުން ދިވެހި މުޖުތަމަޢު ދުރުކުރުމުގެ ގޮތުން ރައީސުލްޖުމްހޫރިއްޔާ ނިންމެވި މުހިންމު ނިންމެވުންތަކެކެވެ.