މިއަހަރަށް ރައްޔިތުންގެ މަޖިލިސް ހުޅުވުމަށް މާދަމާ ބާއްވަވާ ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރިޔާސީ ބަޔަން އިއްވަވާނެއެވެ. މިއީ އެމަނިކުފާނުގެ ދެވަނަ ރިޔާސީ ބަޔާނެވެ.
ރިޔާސީ ބަޔާނަކީ ދިވެހި ޖުމްހޫރިއްޔާގެ ޤާނޫނު އަސާސީގެ ދަށުން ރައީސުލްޖުމްހޫރިއްޔާ އިއްވަވަން ޖެހިވަޑައިގަންނަވާ ބަޔާނެކެވެ. ޤާނޫނުއަސާސީގެ 84 ވަނަ މާއްދާގައި ބަޔާންކޮށްފައިވާ ގޮތުގައި ކޮންމެ އަހަރެއްގެ ރައްޔިތުންގެ މަޖިލިސް ދައުރު ފަށާ ޖަލްސާގައި އިއްވަވާ ރިޔާސީ ބަޔާނަކީ ޤައުމުގެ ހާލަތު ބަޔާންކޮށްދެއްވައި ޤައުމުގެ ހާލަތު އިތުރަށް ރަނގަޅު ކުރުމަށް ރައީސުލްޖުމްހޫރިއްޔާއަށް ފެނިވަޑައިގަންނަވާ ކަންކަމުގެ މައްޗަށް އަލިއަޅުއްވާލައްވައި އެކުލަވައިލައްވާ ބަޔާނަކަށް ވާންވާނެކަމަށެވެ.
ރިޔާސީ ބަޔާން އިއްވާ ޖަލްސާއަކީ ރައްޔިތުންގެ މަޖިލީހުގެ ކޮންމެ އަހަރެއްގެ ވެސް ދައުރު ފަށާ ޖަލްސާއެވެ. މިއަހަރުގެ ފުރަތަމަ ދައުރު ފެށުމަށް ބާއްވާ ޖަލްސާ ތާވަލުކޮށްފައިވަނީ މާދަމާ ހެނދުނު 9:00 އަށެވެ. އެ ޖަލްސާގައި އޮންނާނީ ރައީސުލްޖުމްހޫރިއްޔާގެ ރިޔާސީ ބަޔާން އިއްވެވުން އެކަންޏެވެ.
ރައްޔިތުންގެ މަޖިލީހުގެ އިދާރާގައި ބާއްވާ މި ޖަލްސާގައި، ސަރުކާރުގެ އިސްވެރިންނާއި، އުއްތަމަ ފަނޑިޔާރާއި، ބޭރު ޤައުމުތަކުން ރާއްޖެއަށް ކަނޑައަޅުއްވަފައިތިއްބާ ސަފީރުންނާއި، އެހެނިހެން ޢިއްޒަތްތެރިންވެސް ބައިވެރިވެވަޑައިގަންނަވާނެއެވެ. ޖަލްސާއަށް ރައީސުލްޖުމްހޫރިއްޔާގެ ދެކަނބަލުން ވަޑައިގަތުމުން އެމަނިކުފާނަށް މަރުހަބާ ދަންނަވާނީ ރައްޔިތުންގެ މަޖިލީހުގެ ރައީސްގެ ދެކަނބަލުންނެވެ. އެތަނުން އެމަނިކުފާނަށް ރިޔާސީ ކުރުނީހެއް އަރުވާނެއެވެ. މަޖިލީސް ކުރާ ގެއިން އެމަނިކުފާނަށް މަރުހަބާ ދަންނަވާނީ މަޖިލީހުގެ ނައިބު ރައީސްއާއި ޕާލަމެންޓަރީ ގްރޫޕު ލީޑަރުންގެ އިތުރުން މަޖިލީހުގެ އިދާރާގެ އިސްވެރިންނެވެ.
މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދެވަނަ ރިޔާސީ ބަޔާނަށްވާއިރު، ސަރުކާރުން ދިވެހިރާއްޖޭގެ ތަރައްޤީއަށް ކަނޑައަޅުއްވާފައިވާ ސިޔާސަތުތައް ބަޔާންކުރައްވާނެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފުރަތަމަ ރިޔާސީ ބަޔާން ބައްޓަން ކުރެއްވީ، ޤައުމު ސިޔާދަތީ މިނިވަންކަން ދެމެހެއްޓުމާއި، ޤައުމު ވެއްޓިފައިވާ އިޤްތިޞާދީ އަނދަވަޅުން އަރައިގަތުމަށެވެ. އެގޮތުން ޤައުމުގެ އިޤްތިޞާދު ކޮޅަށް ޖެހުމަށް ހާސިލްކުރަން ބޭނުންވާ އަމާޒުތައް އެމަނިކުފާނު ޢިއުލާންކުރެއްވިއެވެ. އަދި އެ އަމާޒުގެ ގިނަ ކަންކަން ވަނީ ޙާސިލުކުރައްވާފައެވެ. އެހެންކަމުން މިއަހަރުގެ ރިޔާސީބަޔާނުގައިވެސް ރައްޔިތުންގެ ކަންބޮޑުވުން ހުރި މައްސަލަތަކާއި ސަރުކާރުން މިއަހަރަށް ކަނޑައަޅާ މުހިންމު ސިޔާސަތުތައް ބަޔާނުގެ ތެރެއިން އިއުލާން ކުރައްވާނެކަމަށް ބެލެވެއެވެ.
އާންމު ގޮތެއްގައި ކޮންމެ އަހަރަކުވެސް ރިޔާސީ ބަޔާން އިއްވާ ދުވަހަކީ ބަންދު ދުވަހެއްގެ ގޮތުގައި ހަމަޖައްސައެވެ. އެގޮތުން މާދަމާ ރިޔާސީ ބަޔާން އިއްވަވާއިރު، މި ދުވަސް ބަނދު ދުވަހެއްގެ ގޮތުގައި ސަރުކާރުން ވަނީ ކަނޑައަޅުއްވާފައެވެ.
ރިޔާސީ ބަޔާން އިއްވާ ޖަލްސާއަށް މަޖިލިސް ތައްޔާރުވެފައިވާކަމަށް މަޖިލީހުގެ އިދާރާއިން ވިދާޅުވެއެވެ.