އިންސާނާގެ ދިރިއުޅުމުގައި ދަތި އުނދަގޫ ވަގުތުތަކާ ކުރިމަތިލާން ޖެހުމަކީ އެކަށީގެންވާ ކަމެކެވެ. މިފަދަ ވަގުތުތަކުގައި ކެތްތެރިކަމާއެކު ކަންކަމާ ކުރިމަތިލުމަކީ އީމާންތެރި މުއުމިނެއްގެ ސިފައެކެވެ. ﷲ ސުބުޙާނަހޫ ވަތަޢާލާ ވަނީ ކީރިތި ޤުރުއާނުގައި ކެތްތެރިންނަށް އުފާވެރި ޚަބަރު ދެއްވާފައެވެ.
ނަބިއްޔުންނާއި ސަހާބީންގެ ކެތްތެރިކަން
ކީރިތި ރަސޫލާ ﷺ އާއި އެކަލޭގެފާނުގެ ސަހާބީންނަށް ދިމާވި އުނދަގޫތަކަކީ އަޅުގަނޑުމެންނަށް މިއަދު އޭގެ ޒއްރެއްގެ މިންވަރު ވެސް ތަޙައްމަލު ކުރަން ދަތިވާނެ ކަންކަމެވެ. ނިކަން ވިސްނައިލަބަލާށެވެ! މައްކާގެ މުޝްރިކުން އެބޭކަލުންނަށް ދިން އަނިޔާތަކާއި، ހިޖުރަކުރަން ޖެހުނު ދަތި އުނދަގޫ ދަތުރު، އަދި ހަނގުރާމަތަކުގައި ތަޙައްމަލުކުރަން ޖެހުނު ވޭންތަކަކީ މިއަދު އަޅުގަނޑުމެން އިބުރަތް ހާސިލުކުރަންޖެހޭ ކަންކަމެއް ނޫންހެއްޔެވެ؟
ދަތިތަކުގައި ﷲ އަށް ބަރޯސާވުން
އިންސާނާގެ ހަޔާތުގައި ދިމާވާ ކޮންމެ ކަމަކީ ﷲ ގެ ޙިކުމަތަކުން ދިމާވާ ކަންކަމެވެ. އެހެންކަމުން، ހިތްނޭދޭ ކަމެއް ދިމާވުމުން މާޔޫސްވެ، ހިތާމައިގެ ވަޅުގަނޑަށް ވެއްޓުމުގެ ބަދަލުގައި، ﷲ އަށް ބަރޯސާވެ، އެކަލާނގެ ރަޙްމަތަށް އުއްމީދުކުރުމަކީ މުއުމިނެއްގެ ކިބައިގައި ހުންނަންވާނެ ސިފައެކެވެ.
ކެތްތެރިކަމުގެ މަތިވެރި ދަރަޖަ
ކެތްތެރިކަމަކީ އީމާންކަމުގެ ދެބައިކުޅަ އެއްބައި ކަމުގައި ބުނެވިފައިވެއެވެ. އެހެނީ، ކެތްތެރިކަމަކީ އަޅުކަން ކުރުމުގައި ސާބިތުވެ ހުރުމާއި، ފާފަތަކުން ދުރުހެލިވުމާއި، ދަތިތަކުގައި ކުރިމަތިލުމުގެ ބާރު ދޭ އެއްޗެކެވެ.
ކެތްތެރިކަމުގެ މޭވާ ފޮނިވާނެ!
ގިނަ ފަހަރަށް އަޅުގަނޑުމެންނަށް ދިމާވާ ދަތިތަކުގެ ޙިކުމަތް ވަގުތުން ނޭނގި ހިނގައިދާނެއެވެ. ނަމަވެސް، މަސްތަކެއް ނުވަތަ އަހަރުތަކެއް ފަހުން ވިސްނާލުމުން، އެދުވަހު އެކަން އެގޮތަށް ވެގެން ދިޔައީ އަޅުގަނޑުމެންގެ ހެވަށްކަން އެނގި، ﷲ ގެ ޙިކުމަތް ވިސްނިގެންދެއެވެ.
އަޅުގަނޑުމެންގެ ދިރިއުޅުމުގައި ދިމާވާ ކޮންމެ ކަމަކީ ﷲ ގެ އިރާދަފުޅާއެކު ހިނގާ ކަމެކެވެ. އެހެންކަމުން، ހިތްނޭދޭ ކަމެއް ދިމާވުމުން މާޔޫސްނުވެ، ކެތްތެރިކަމާއެކު ކުރިމަތިލުމަކީ މުއުމިނެއްގެ ވާޖިބެކެވެ. ﷲ ވަނީ ކެތްތެރިންނާއެކުގައެވެ. އެހެނީ، އެއްވެސް ނަފްސަކަށް އެ ނަފްސަކަށް ކުޅަދާނަ ވެގެން ވާ ވަރަށް މެނުވީ އެކަލާނގެ ތަކުލީފު ނުޖައްސާނެއެވެ. އެހެންކަމުން، ކެތްތެރިކަމާއެކު ދަތިތަކާ ކުރިމަތިލައި، އެކަލާނގެ ދަރުމައަށް އުއްމީދުކުރާ ހިނދު، ހަމަކަށަވަރުން އެކަލާނގެ ވަނީ އަޅުގަނޑުމެންނާ އެކުގައެވެ.