ގއ. އަތޮޅު ހޮސްޕިޓަލުގައި ސިޒޭރިއަން ހެދުމަށްފަހު މަންމައާއި ދަރިފުޅު ނިޔާވި މައްސަލައިގެ ތަހުގީގު އަވަސްކޮށް، އިހުމާލުވި ފަރާތްތަކާމެދު ހަރުކަށި ފިޔަވަޅު އެޅުމަށް ކައުންސިލުން ގޮވާލައިފިއެވެ. ވިލިނގިލީ ކައުންސިލުން މި އަޑުއުފުލައި ތަހުގީގު އަވަސް ކުރުމަށް ގޮވާލާގައި ވަނީ އެކައުންސިލުގެ ރައީސާއި ނައިބުރައީސްގެ އިތުރުން 5 ކައުންސިލު މެންބަރުންގެ ސޮޔާއެކު ނެރެފައިވާ ނޫސް ބަޔާނެއްގައެވެ.
ކައުންސިލުން މިއަދު ނެރުނު ބަޔާނުގައި ބުނެފައިވަނީ ގއ. އަތޮޅު ހޮސްޕިޓަލަކީ ކައިރި ރިސޯޓުތަކާއި ކޫއްޑޫ ފިޝަރީޒް ކޮމްޕްލެކްސް އަދި އެއާޕޯޓުގައި މަސައްކަތްކުރާ މުވައްޒަފުން ވެސް ފަރުވާ ހޯދާ ތަނަކަށް ވާތީ، އެތަނަކީ އިތުބާރު ހިފޭ ޕްރޮފެޝަނަލް ތަނަކަށް ހަދަން ޖެހޭ ކަމަށެވެ.
މި ބަޔާން ނެރެފައިވަނީ މިވަގުތު މުޅި ގައުމު އެކަމަކާމެދު އަޑު އުފުލަމުންދާ ހާއްސަކޮށް މުޅި ގއ ވިލިނގިލީގެ ރައްޔިތުންގެ ކަންބޮޑުވުމަކަށް ވެފައިވާ މައްސަލަ؛ އަންހެނަކާއި ތުއްތުދަރިފުޅަކު ނިޔާވި ހާދިސާއާ ގުޅިގެންނެވެ. ބަނޑަށް އަށްމަހުގައި ހޮސްޕިޓަލަށް ގެންދިޔަ ޝިއުނާ ތައުފީގުގެ ހާލަތު ސީރިއަސްވުމާ ގުޅިގެން ސިޒޭރިއަން ހަދަން ޖެހުނު ނަމަވެސް އިތުރު ފަރުވާއަށް މާލެ ގެންދިއުމަށް ކޫއްޑޫ އެއާޕޯޓަށް ގެންދިޔަ ވަގުތު ޝިއުނާ ނިޔާވީ އެވެ. އަދި އޭނާގެ ތުއްތު ދަރިފުޅު މާލެ ގެނައިފަހުން ވަނީ ނިޔާވެފަ އެވެ.
މި މައްސަލައިގައި ހޮސްޕިޓަލުން ރަނގަޅަށް ފަރުވާ ނުދޭ ކަމަށް އާއިލާއިން ތުހުމަތު ކުރާއިރު، ކައުންސިލުން ބުނެފައިވަނީ މިފަދަ ހިތާމަވެރި ހާދިސާތައް ތަކުރާރުވިޔަ ނުދިނުމަށް ސިއްހީ ހިދުމަތް އިތުރަށް ހަރުދަނާކޮށް، ރައްޔިތުންނަށް ފޯރުކޮށްދޭ ހިދުމަތުގެ ފެންވަރު ރަނގަޅު ކުރަން ޖެހޭ ކަމަށެވެ. ހަތް ކައުންސިލަރުންގެ ސޮޔާއެކު ނެރުނު ބަޔާނުގައި އިތުރަށް ފާހަގަކޮށްފައިވަނީ ބަލިމީހުން ހޮސްޕިޓަލަށް ގެންދިއުމާއި، ޑޮކްޓަރުން ފަރުވާ ދިނުމުގެ އުސޫލާއި، އެޑްމިޓުކޮށްފައި ތިބޭއިރު ދޭންޖެހޭ އަޅާލުމާއި އޯގާތެރިކަން އަދި ފަރުވާއަށް ފޮނުވަންޖެހޭ މީހުންގެ ދަތުރުފަތުރާއި ރިފަރަލް ޕްރޮސީޖާގެ ތެރޭގައި ހިމެނޭ ހުރިހާ ކަމެއް މުރާޖައާކޮށް، ބޮޑެތި އިސްލާހުތަކެއް ގެންނަން ޖެހޭ ކަމަށެވެ.
“ސަރުކާރުން ރައްޔިތުންނަށް އިތުބާރުހުރި ސިއްހީ ހިދުމަތެއް ފޯރުކޮށްދިނުމަށް ގިނަގުނަ މަސައްކަތްތަކެއް ކުރައްވައި، އެކަމަށް ބޮޑު ހޭދައެއް ކުރައްވާފައިވީ ނަމަވެސް އޭގެ ފުރިހަމަ މަންފާ ރައްޔިތުންނަށް ލިބޭނީ އެކަމާ ހަވާލުވެ ތިބޭ ފަރާތްތައް ޒިންމާދާރުކުރުވައި، އަޅަންޖެހޭ ފިޔަވަޅުތައް އަޅައިގެންނެވެ. މި ހާދިސާއިން، މިހާރު ސިއްހީ ހިދުމަތް ދިނުމަށް ހަމަޖެހިފައިވާ އުސޫލުތަކަށް ބޮޑެތި ބަދަލުތަކެއް ގެންނަން ޖެހިފައިވާކަން މި ކައުންސިލަށް ފާހަގަކުރެވެ އެވެ،” ވިލިނގިލީ ކައުންސިލުގެ ބަޔާނުގައި ބުނެފައިވެއެވެ.