ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ބައި-އިލެކްޝަންގައި މެންދުރު 11:00 އާ ހަމައަށް 1725 މީހުން ވޯޓުލައިފިއެވެ. މިއީ ވޯޓުލުމުގެ ޙައްގު ލިބިފައިވާ މީހުންގެ 15 އިންސައްތައެވެ.
އިލެކްޝަންސް ކޮމިޝަނުން ހާމަކުރި ތަފާސްހިސާބުތަކުން ދައްކާގޮތުގައި، މި ބައި-އިލެކްޝަންގައި ވޯޓުލުމުގެ ޙައްގު ލިބިފައިވާ ޖުމްލަ 11،325 މީހުންގެ ތެރެއިން މިހާތަނަށް ވޯޓުލާފައިވާ 1725 މީހުންގެ ތެރޭގައި ހިމެނެނީ 798 އަންހެނުންނާއި 927 ފިރިހެނުންނެވެ.
މިއަދުގެ ބައި-އިލެކްޝަނަކީ ދެ ރަށެއްގެ ކައުންސިލް އަދި 10 ރަށެއްގެ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް މެންބަރުން ހޮވުމަށް ބާއްވާ ވޯޓުނެގުމެކެވެ.
ވޯޓުލުން ފެށިފައިވަނީ މިއަދު ހެނދުނު 8:00 ގައި ކަމަށާއި، ވޯޓުލުން ނިމޭނީ މިއަދު ހަވީރު 4:00 ގައި ކަމަށް އިލެކްޝަންސް ކޮމިޝަނުން މަޢުލޫމާތު ދެއެވެ.
މާލޭގައި ދިރިއުޅޭ ރަށްތަކުގެ ރައްޔިތުންނަށް ވޯޓުލުމުގެ ފުރުޞަތު ދިނުމަށްޓަކައި މާފަންނު މަދުރަސާގައި ވޯޓު ފޮށިތައް ބަހައްޓާފައިވާކަން ފާހަގަކުރެވެއެވެ.
އިލެކްޝަންސް ކޮމިޝަނުން ވަނީ ވީހާވެސް ގިނަ މީހުން ވޯޓުލުމަށް އިލްތިމާސްކޮށްފައެވެ.