ރަމަޟާން މަހާ ދިމާކޮށް، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރިއަށްގެންދާ “އެއްގެއިން އަނެއްގެއަށް” ކެމްޕެއިނަށް އާންމުންގެ ފަރާތުން ވަރަށް ބޮޑު ތަރުހީބެއް ލިބެމުންދާ ކަމަށް އެ ކޯޕަރޭޝަނުން ހާމަކޮށްފިއެވެ. މި މަހުގެ 1 އިން 16 އަށް ކުރިއަށްގެންދާ މި ކެމްޕޭނުގެ ދަށުން މިހާތަނަށް 89 އައިޓަމް ހަދިޔާ ކުރެވިފައިވާ ކަމަށް އެޗްޑީސީން ވަނީ މަޢުލޫމާތު ދީފައެވެ.
ދައުލަތުގެ މީޑިއާއަށް މައުލޫމާތު ދެއްވަމުން، އެޗްޑީސީގެ މާކެޓިންގ އެންޑް ޕަބްލިކް ރިލޭޝަންގެ އެސިސްޓެންޓް ޑިރެކްޓަރ ހަސަން ޝަހީދު ވިދާޅުވި ގޮތުގައި، “ރަމަޟާންމަހަށް ތައްޔާރުވުމުގެ ގޮތުން ގޭގައި ހިފައިގެންގުޅޭ ސާމާނާއި ފަރުނީޗަރުފަދަ ތަކެތި އައު ކުރުމަކީ ގިނަ ބައެއްގެ ސަޤާފަތެއް” ކަމަށާއި، ނަމަވެސް މިގޮތަށް އައު ކުރާއިރު ބޭނުން ހިފޭ އެއްޗެހިވެސް އުކާލާކަން ފާހަގަކުރެވޭތީ، މި ހަރަކާތުގެ މައިގަނޑު މަޤްޞަދަކީ އެފަދަ ތަކެތި އުކާލުމުގެ ބަދަލުގައި ބޭނުންޖެހިފައިވާ އެހެން ފަރާތްތަކަށް ހަދިޔާކުރުމުގެ ފުރުޞަތު ހޯދައިދިނުން ކަމަށެވެ.
މި ކެމްޕޭނުގެ އެންމެފަހުގެ ތަފާސްހިސާބުތަކަށް ބަލާއިރު، މަޢުލޫމާތު ސާފުކުރުމަށް 249 ފަރާތަކުން ގުޅާފައިވާއިރު، 86 ފަރާތަކުން ތަކެތި ހޯދުމަށް އެދިފައިވެއެވެ. އަދި މިހާތަނަށް 101 އައިޓަމް ލިބި، 89 އައިޓަމް ހަދިޔާކުރެވިފައިވާ ކަމަށް އެޗްޑީސީން ހާމަކުރެއްވިއެވެ. މީގެ ތެރެއިން އެންމެ ގިނައިން ހަދިޔާކުރެވިފައިވަނީ ފަރުނީޗަރެވެ.
މި ކެމްޕޭނަށް މާލެއާއި އަތޮޅުތަކުން ލިބެމުންދާ ތަރުހީބާއެކު، އެޗްޑީސީން ވަނީ މިއީ ރަމަޟާން މަހާ ދިމާކޮށް ފްލެޓުތަކުން އުކާލުމަށް ނެރެފައި ހުންނަ ކުނީގެ މައްސަލަ ހައްލުކުރުމަށާއި، އިސްރާފް މަދުކުރުމަށް އަމާޒުކޮށްގެން ކުރިއަށްގެންދާ ކެމްޕޭނެއްކަން ފާހަގަކުރައްވާފައެވެ.
މި ކެމްޕޭނުގައި ބައިވެރިވެ ތަކެތި ހަދިޔާކުރަން ބޭނުންވާ ފަރާތްތަކަށް އެޗްޑީސީގެ ހޮޓްލައިން ނަންބަރު 7412111 އަށް ގުޅައިގެން ކުރިއަށް ދެވޭނެއެވެ.