ގދ. ހޯނޑެއްދޫ ބަނދަރު ސަރަޙައްދު ސާފުކޮށް ބެލެހެއްޓުމުގެ މަސައްކަތް އައުޓްސޯސްކޮށް ބެއްޖާ މޯލްޑިވްސް ޕްރައިވެޓް ލިމިޓެޑާ ހަވާލުކޮށްފިއެވެ.
6 މަސް ދުވަހުގެ މުއްދަތަކަށް ވެވިފައިވާ މި އެއްބަސްވުމާ ގުޅޭގޮތުން “ހުވަދޫ މީޑިއާ” އަށް މައުލޫމާތު ދެއްވަމުން ހޯނޑެއްދޫ ކައުންސިލްގެ ރައީސް ޙުސައިން ވާރިޝް ވިދާޅުވީ، މި އެއްބަސްވުމުގެ ދަށުން ބެއްޖާ މޯލްޑިވްސްގެ މައިގަނޑު މަސްއޫލިއްޔަތަކީ ބަނދަރު ސަރަޙައްދު ސާފުކޮށް ބެލެހެއްޓުން ކަމެވެ.
އިތުރަށް ވާހަކަ ދައްކަވަމުން ރައީސް ވާރިޝް ފާހަގަކުރެއްވި ގޮތުގައި، މި އެއްބަސްވުމުގެ ދަށުން ކުރެވޭ މަސައްކަތްތައް ރަނގަޅު ފެންވަރެއްގައި ކުރިއަށްދާނަމަ، ކުރިއަށް އޮތްތަނުގައި އެހެނިހެން މަސައްކަތްތައް ވެސް އައުޓްސޯސްކޮށްގެން ކުރިއަށް ގެންދިއުމަށް ވަނީ ރޭވިފައެވެ.
މި އެއްބަސްވުމުގައި ބެއްޖާ މޯލްޑިވްސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ ކުންފުނީގެ މެނޭޖިންގ ޑިރެކްޓަރ އަބްދުﷲ ނަސްރެވެ. އަދި ހޯނޑެއްދޫ ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް ޙުސައިން ވާރިޝެވެ.
މި މަސައްކަތް އައުޓްސޯސްކުރުމަކީ ރަށުގެ ބަނދަރު ސަރަޙައްދު އިތުރަށް ހަރުދަނާކޮށް، ސާފުތާހިރުކަން ދެމެހެއްޓުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.