ޕޮލްކޯ ފުލެޓުތަކުގެ މަޝްރޫޢުގައި ކޮރަޕްޝަނަށް މަގުފަހިވާ ގިނަ ކަންތައްތަކެއް ހުރިކަން އޮޑިޓަރ ޖެނެރަލްގެ އޮފީހުން ކުރި އޮޑިޓަކުން ހާމަވެއްޖެއެވެ.
އޮޑިޓަރ ޖެނެރަލް ހުސައިން ނިޔާޒީ މިއަދު ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވިދާޅުވި ގޮތުގައި، 580 މިލިއަން ރުފިޔާއަށް ފެށި މި މަޝްރޫޢަށް މިހާތަނަށް 1 ބިލިއަނަށްވުރެ ގިނަ ރުފިޔާ ޚަރަދުކޮށްފައިވެއެވެ. އޭރުގެ މާކެޓް ރޭޓަށް ބަލާއިރު 240-354 މިލިއަން ރުފިޔާ އިތުރަށް ޚަރަދުކޮށްފައިވާކަމަށް އޮޑިޓުން ފާހަގަކުރެވުނެވެ.
މަޝްރޫޢު ފުރަތަމަ ހަވާލުކުރެވުނު ނޫމަޑި ކުންފުނިން މަސައްކަތް ނުނިމުމުން، އެ ކުންފުނީގެ ސަބް-ކޮންޓްރެކްޓަރެއް ކަމަށްވާ އައިލެންޑް އެކްސްޕަރޓާ މަސައްކަތް ހަވާލުކުރިއެވެ. އަދި ދެކޯމަސް ކުންފުންޏާވެސް މަސައްކަތް ހަވާލުކޮށްފައިވަނީ ޓެންޑަރ އުސޫލުތަކާ ޚިލާފަށްކަން އޮޑިޓުން ފާހަގަކުރެވުނެވެ.
މީގެ އިތުރުން، ސާވާއަށް ދިމާވި މައްސަލައަކާ ގުޅިގެން މަޝްރޫޢާ ގުޅޭ ގިނަ އަދަދެއްގެ މުހިންމު ލިޔެކިޔުންތަކެއް ޕޮލްކޯއިން ގެއްލިފައިވާކަން ހާމަވިއެވެ. މިކަމުގެ ސަބަބުން ބިޑް ޕްރޮސެސް ކުރިއަށް ދިޔަގޮތް ސާފުކޮށް ދެނެގަނެވިފައި ނުވާކަމަށް އޮޑިޓަރ ޖެނެރަލް ވިދާޅުވިއެވެ.
އޮޑިޓަރ ޖެނެރަލް ވިދާޅުވި ގޮތުގައި މި މައްސަލަ ތަޙުޤީޤީ އިދާރާތަކުން ބެލުން މުހިންމެވެ. މި މަޝްރޫޢުގައި ހިނގާފައިވާ ކަންކަމުގެ ސަބަބުން ދައުލަތަށް ބޮޑު ގެއްލުމެއް ވެފައިވާކަން އޮޑިޓުން ފާހަގަކުރެވިފައިވެއެވެ.