ވައި ނުސާފުވާ މިންވަރު އިތުރުވެ، ނޭވާލާ ނިޒާމުގެ މައްސަލަތައް ކުރިމަތިވުމުގެ ފުރުސަތު އޮތުމާއެކު، އެކަމަށް ސަމާލުވެ ރައްކާތެރިކަމުގެ ފިޔަވަޅުތައް އެޅުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިއަދު އިލްތިމާސްކޮށްފިއެވެ.
އެޗްޕީއޭއިން މިކަން ފާހަގަކޮށް، ވައި ސާފު މިންވަރު ބެލުމަށް މިނިސްޓްރީ އޮފް ޓޫރިޒަމް އެންޑް އެންވަޔަރަމެންޓްގެ ލިންކް އަދި IQAir Visual އެޕް މެދުވެރިކޮށް ބަލާލުމަށް އާންމުންނަށް އިރުޝާދު ދީފައިވެއެވެ. މިގޮތުން މިއަދު މާލެ ސަރަހައްދުގެ ވައިނުސާފު މިންގަނޑު ހުރީ 115 ގައި ކަމަށާއި، މިއީ މެދު މިންގަނޑެއް ކަމަށް އެޗްޕީއޭއިން ވަނީ ފާހަގަކޮށްފައެވެ.
މެދުމިންގަނޑަށް ވައި ނުސާފުވެއްޖެނަމަ ނޭވާލާ ނިޒާމުގެ މައްސަލަތައް ޖެހުމުގެ ފުރުސަތު ބޮޑުވެގެންދާނެކަމަށް އެޗްޕީއޭއިން ވަނީ އިންޒާރުދީފައެވެ. އަދި މިފަދަ ހާލަތްތަކުގައި ނާޒުކު ހާލަތުގައިވާ ފަރާތްތަކުން ބޭރަށް ނިކުމެ އުޅުމުން ދުރުހެލިވުމަށާއި، ނޭވާލާ ނިޒާމުގެ މައްސަލަތައް ހުންނަ ފަރާތްތަކުން ބޭރުގައި ކަސްރަތުކުރުމާއި ކުޅިވަރު ކުޅުން ފަދަ ހަރަކާތްތައް މަޑުޖައްސާލުމަށް އިރުޝާދުދީފައިވެއެވެ.
މި ހާލަތުގައި ރައްކާތެރިވުމަށް އަޅަންޖެހޭ ފިޔަވަޅުތަކުގެ ތެރޭގައި ބޭރުގެ ނުސާފު ވައި ގޭތެރެއަށް ނުވަންނާނެހެން ގޭގެ ދޮރުތައް ލެއްޕުމާއި އެއަރ ޕިއުރިފަޔަރ ބޭނުންކުރުން ހިމެނެއެވެ. އަދި ނޭވާލާ ނިޒާމުގެ މައްސަލަ ހުންނަ ފަރާތްތަކުން ގެއިން ބޭރަށް ނިކުންނަން ޖެހިއްޖެ ހާލަތެއްގައި މާސްކު އަޅައިގެން އުޅުމަށްވެސް އެޗްޕީއޭއިން ވަނީ އިލްތިމާސްކޮށްފައެވެ.