ހާއްސަ އެހީއަށް ބޭނުންވާ މީހުންނަށް ދެމުންގެންދާ އެލަވަންސް މުރާޖައާކުރުމުގެ މަސައްކަތް ކުރިއަށްދާ ކަމަށް އިޖްތިމާއީ އަދި އާއިލީ ތަރައްޤީއާ ބެހޭ ވަޒީރު އައިޝަތު ޝިހާމް މިއަދު ވިދާޅުވެއްޖެއެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެއް ކަމަށް ވަޒީރު ފާހަގަކުރެއްވިއެވެ.
ރައީސް އޮފީހުގައި މިއަދު ބޭއްވުނު ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ވިދާޅުވީ، "އެކަން ކުރިއަށް އެބަދޭ ބަލައިގެން. މި މަސައްކަތް ފައްޓާއިރު ވިސްނަން ޖެހޭކަމަކީ އޭގެ މަޢުލޫމާތު ހުރި ގޮތުންނާއި ކުއްލިއަކަށް ވަކިން ދެވިފައި ހުރި އެއްޗެހިތަކެއް ހުރީމަ ފުރަތަމަ ހާމަނައިޒް ކުރެވި އެ މަޢުލޫމާތުގެ އަލީގައި ގޮތްތަކެއް ނިންމަން ޖެހުން،" ކަމަށެވެ.
މިހާރު ހާއްސަ އެހީއަށް ބޭނުންވާ މީހުންނަށް އެލަވަންސްގެ ގޮތުގައި ކޮންމެ މަހަކު ދެމުން ގެންދަނީ 2,000 ރުފިޔާއެވެ. ރައީސް މުޢިއްޒުގެ ވިސްނުންފުޅުގައި ވަނީ މި އަދަދު އިތުރުކުރެއްވުމަށެވެ. އަދި މިއީ ރައީސް މުޢިއްޒު ވަރަށް ގާތުން ބައްލަވަމުން ގެންދަވާ މައްސަލައެއް ކަމަށް ވަޒީރު ފާހަގަކުރެއްވިއެވެ.
އިޖްތިމާއީ ތަރައްޤީއާ ބެހޭ ވުޒާރާއިން ވަނީ ނުކުޅެދުންތެރިކަން ހުންނަ މީހުންނަށް މުޖުތަމަޢުގައި ފުރިހަމައަށް ބައިވެރިވެ، އާމްދަނީ ހޯދުމުގެ ފުރުސަތު ހޯދައިދިނުމަށް "އެމްޕަވަމަންޓް ހަބް" ގެ ނަމުގައި ހާއްސަ މަރުކަޒެއް ވެސް ޤާއިމްކޮށްފައެވެ.
މި ސަރުކާރުން ގެންދަނީ ނުކުޅެދުންތެރިކަން ހުންނަ ފަރާތްތައް ބާރުވެރިކޮށް، އެ ފަރާތްތަކުން އަމިއްލަ ފައިމައްޗަށް ތެދުވުމުގެ ޤާބިލްކަން އިތުރުކުރުމަށް ގިނަގުނަ ޕްރޮގްރާމްތަކާއި ތަމްރީންތައް ހިންގަމުންނެވެ.