ކުރިމިނަލް ކޯޓުގެ ޑިޖިޓަލް އިންފްރާސްޓްރަކްޗަރއަށް ދިމާވި މައްސަލައަކާ ގުޅިގެން ކޯޓުގެ އޮންލައިން ޝަރީޢަތްތައް ވަނީ ވަގުތީގޮތުން މެދުކެނޑިފައެވެ.
މި މައްސަލަ ދިމާވެފައިވަނީ ޑީޖީއޭގެ ސާވަރަށް ދިމާވި މައްސަލައަކާ ގުޅިގެންނެވެ.
ކުރިމިނަލް ކޯޓުން މިއަދު ނެރުނު ބަޔާނެއްގައި ބުނެފައިވާ ގޮތުގައި، “ޑީޖީއޭގެ ސާވަރަށް ދިމާވި އިޝޫއަކާ ގުޅިގެން މިދިޔަ ހޮނިހިރު ދުވަހުން ފެށިގެން އޮންލައިންކޮށް ހިންގާ ހުރިހާ ޝަރީޢަތްތަކެއް ވަނީ ހުއްޓިފައެވެ.” މި މައްސަލައާ ގުޅިގެން ކޯޓުގެ އިންޓަނެޓް، ނެޓްވޯކް އަދި ފޯނު ލައިންތައް ވެސް ވަނީ މެދުކެނޑިފައެވެ.
ކޯޓުގެ މަސައްކަތްތަކަށް މި ދަތިތައް ކުރިމަތިވެފައިވީ ނަމަވެސް، މިވަގުތު ކުރިއަށްދަނީ ހާޒިރުކޮށްގެން ކުރިއަށް ގެންދެވޭ އަޑުއެހުންތަކާއި ބަންދާމެދު ގޮތެއް ނިންމުމުގެ މައްސަލަތަކެވެ. ނަމަވެސް، ޖާގައިގެ ދަތިކަން ހުރުމާއެކު، ބަންދުގައި ތިބި ދަޢުވާލިބޭ ފަރާތްތަކާއި، ޕްރޮސިކިއުޓަރ ޖެނެރަލްގެ އޮފީހުގެ ވަކީލުންނާއި، ދިފާޢީ ވަކީލުންނާއި ރަށްރަށުގައި ތިބި ހެކިންގެ އަޑުއެހުންތައް އާންމު އުސޫލުން ކުރިއަށް ގެންދާނީ އޮންލައިންކޮށެވެ.
މި ޓެކްނިކަލް މައްސަލަ ހައްލުކުރުމަށް މަސައްކަތްތަކެއް ކުރަމުންދާކަން ކޯޓުން ފާހަގަކޮށްފައިވެއެވެ. އަދި އާންމު ޚިދުމަތްތައް އަލުން އިއާދަކުރެވޭނެ ތާރީޚެއް އަންގާނެ ކަމަށް ކޯޓުން މަޢުލޫމާތު ދީފައިވެއެވެ.