އިސްރަށްވެހިންގެ ކިބައިން ޒުވާނުން މަޢުލޫމާތުތައް ހޯދައި، ހުނަރުތައް ދަސްކުރަންޖެހޭކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެއެވެ. މެޑަމް ސާޖިދާ މިހެން ވިދާޅުވީ މިއަދު މާލޭގައި ބޭއްވުނު “އިސްވާރުންގެ އަހަރީ އުފާ – 2025” ގެ ނަމުގައި ބޭއްވުނު ޖަލްސާގައި ވާހަކަފުޅު ދައްކަވަމުންނެވެ.
މި ޖަލްސާއަކީ މިދިޔަ އަހަރުގެ ފެބްރުއަރީ މަހުގެ 17 ވަނަ ދުވަހު މާލޭގައި ހުޅުވުނު އިސްރަށްވެހިންގެ ނާދީއަށް 1 އަހަރު ފުރުން ފާހަގަކުރުމަށް ބޭއްވުނު ޖަލްސާއެކެވެ.
މެޑަމް ސާޖިދާ ވިދާޅުވީ އިސްރަށްވެހިންގެ ތަޖުރިބާތަކާއި މަޢުލޫމާތު ޒުވާނުންނަށް ފޯރުކޮށްދިނުމަކީ ވަރަށް މުހިންމު ކަމެއް ކަމަށެވެ. އަދި މި ތަޖުރިބާތަކާއި މަޢުލޫމާތާއި ހުނަރު އަދުގެ ޒުވާނުންނަށް ފޯރުކޮށްދިނުމަށް އިސްރަށްވެހިންގެ ކިބައިން އެދިވަޑައިގެންނެވިއެވެ. މި ޖަލްސާގައި ވާހަކަފުޅު ދައްކަވަމުން މެޑަމް ސާޖިދާ އިތުރަށް ފާހަގަކުރެއްވި ގޮތުގައި، ދިވެހި ޤައުމު މި ދެކޭ ކުރިއެރުމުގެ މޭސްތިރިންނަކީ އިސްރަށްވެހިންނެވެ. އެކަމަނާ ވިދާޅުވީ އިސްރަށްވެހިންގެ ތަޖުރިބާއާއި ޢިލްމަކީ ޤައުމު ބިނާކުރުމުގައި އަގުހުރި ވަސީލަތެއް ކަމަށެވެ.
“އިސްރަށްވެހިންގެ ފަރާތުން ޒުވާނުންނާއި ކިޔަވާ ކުދިން، ޢިލްމީ ފިކުރީ އަދި ހުނަރުގެ މަންފާ ލިބިގަންނަންޖެހޭ. އަޅުގަނޑުގެ އުންމީދަކީ މި ނާދީއަކީ އިސްރަށްވެހިންގެ ކިބައިން މަޢުލޫމާތާއި ތަޖުރިބާ މިއަދުގެ ޖީލުތަކަށް ފޯރުކޮށްދޭ ފުރުޞަތު ހުޅުވިގެންދާނެ ތަނެއްކަމުގައި ވެގެންދިޔުން.” މެޑަމް ސާޖިދާ ވިދާޅުވިއެވެ.
މީގެ އިތުރުން، ރާއްޖޭގެ އެކިކަންކޮޅުތަކުގައި އިސްރަށްވެހިންގެ ނާދީތައް ތަރައްޤީކުރުމަށް ސަރުކާރުން ދެއްވާ އިސްކަމުން ހާމަވެގެންދަނީ އިޖުތިމާޢީ ގުޅުންތައް ބަދަހިކުރުމަށާއި ދުވަސްވީ މީހުންގެ އަގުވަޒަންކުރުމަށް ސަރުކާރުން ދޭ ސަމާލުކަން ކަމަށް މެޑަމް ސާޖިދާ ފާހަގަކުރެއްވިއެވެ.
މި ޖަލްސާގައި އިސްރަށްވެހިންގެ ނާދީގެ ލޯގޯ ތަޢާރަފްކުރެވުނެވެ. އަދި ނާދީގެ ޚިދުމަތްތައް ހޯދާ ފަރާތްތަކަށާއި އެ ތަނުގައި ހިންގާ ޕްރޮގުރާމްތަކުގައި ބައިވެރިވުމަށް ބޭނުންކުރެވޭނެ މެންބަރޝިޕެންބަރޝިޕް ކާޑެއްވެސް ތަޢާރަފްކުރެވުނެވެ. މި ކާޑު ތަޢާރަފްކޮށްދެއްވީ ޕެންޝަން އޮފީހުގެ ސީއީއޯ ޝުޖާތާ ހަލީމެވެ.
ފާއިތުވި އަހަރު އިސްރަށްވެހިންގެ ނާދީން ހިންގި 17 ޕްރޮގުރާމެއްގައި 478 މީހުން ބައިވެރިވެފައިވާކަން ފާހަގަކުރެވެއެވެ. މި ޕްރޮގުރާމްތަކުގެ ތެރޭގައި ޞިއްހީ އެކި ކަންކަމަށް ހޭލުންތެރި ކުރުމުގެ ޕްރޮގުރާމްތައް ހިމެނެއެވެ.