ފުވައްމުލަކުގައި ހުންނަ ޔޫރޯ ސްޓޯރުގެ ގުދަނަކުން ގިނަ އަދަދެއްގެ ސިނގިރޭޓު ކޭސްތަކެއް ވަގަށް ނަގައިފިއެވެ.
ފުލުހުން މަޢުލޫމާތު ދެއްވި ގޮތުގައި ޔޫރޯގެ ގުދަނުން ވަގަށް ނަގާފައިވަނީ 130 ކާޓަން ސިނގިރޭޓެވެ. މިހާރު ސިނގިރޭޓު ވިއްކާ އަގުތަކަށް ބަލާއިރު، މި ވައްކަމުގެ ސަބަބުން ޔޫރޯ ސްޓޯރަށް ތިން ލައްކަ ރުފިޔާއަށްވުރެ މަތީގެ ގެއްލުމެއް ލިބޭނެކަމަށް ލަފާކުރެވެއެވެ.
ފުލުހުން ބުނީ ގޮތުގައި މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައެއް ނުވެއެވެ. އަދި މައްސަލައިގެ ތަޙުޤީޤު ދަނީ ކުރިއަށް ކަމަށާއި، އެހެންކަމުން މައްސަލައިގެ އިތުރު ތަފްސީލު މިވަގުތު ހާމަކުރެވެން ނެތް ކަމަށް ފުލުހުން ވިދާޅުވިއެވެ.
މި މައްސަލަ ދިމާވެފައިވަނީ މިދިޔަ ޑިސެމްބަރު މަހުން ފެށިގެން ސިނގިރޭޓުން ނަގާ ކަސްޓަމްސް ޑިއުޓީ ބޮޑުކުރުމަށްފަހުގައެވެ. ޑިއުޓީ ބޮޑުކުރުމާ ގުޅިގެން ސިނގިރޭޓު ވަގަށް ނެގުމުގެ މައްސަލަތައް އިތުރުވެފައިވާކަން ފާހަގަކުރެވެއެވެ. މިގޮތުން މާލޭގެ ގުދަނަކުން ވެސް މި އަހަރުގެ ތެރޭގައި ގިނަ އަދަދެއްގެ ސިނގިރޭޓު ގެއްލިފައިވާކަން ފާހަގަކުރެވެއެވެ.