އައްޑޫ ސިޓީއަށް ދިމާވެފައިވާ ކަރަންޓުގެ މައްސަލަ ހައްލުކުރުމަށް ސަރުކާރުން އެ ސިޓީއަށް ގެންދިޔަ 1.8 މެގަވޮޓްގެ ޖަނަރޭޓަރު އިންސްޓޯލްކޮށް، ބޭނުންކުރަން ފަށައިފިއެވެ. މި މަޢުލޫމާތު ދެއްވާފައިވަނީ ފެނަކަ ކޯޕަރޭޝަނުންނެވެ.
އައްޑޫ ސިޓީގެ ރަށްރަށުން ކަރަންޓު ކެނޑުމުގެ މައްސަލަ ކުރިމަތިވާތާ އަހަރުތަކެއް ވެފައިވާއިރު، މިހާތަނަށް ދާއިމީ ޙައްލެއް ނުލިބި އޮތުމަކީ އެ ސިޓީގެ ރައްޔިތުންގެ ކަންބޮޑުވުމެކެވެ. މި މައްސަލަ ރަމަޟާން މަހަށް ހައްލުކުރުމަށް ފެނަކަ ކޯޕަރޭޝަނާއި ހަވާލުކުރައްވައިގެން ސަރުކާރުން ގެންދަވަނީ ގިނަ މަސައްކަތްތަކެއް ކުރައްވަމުންނެވެ.
ފެނަކަ ކޯޕަރޭޝަނުން މަޢުލޫމާތު ދެއްވާފައިވާ ގޮތުގައި، މިދިޔަ އަންގާރަ ދުވަހު އައްޑޫ ސިޓީއަށް ގެންދެވުނު 1.8 މެގަވޯޓުގެ ޖަނަރޭޓަރު ސެޓް އިންސްޓޯލްކޮށް، މިހާރު އެ ޖަނަރޭޓަރު ސެޓުން ކަރަންޓު ފޯރުކޮށްދެމުން ގެންދެއެވެ. މީގެ އިތުރުން، އައްޑޫ ސިޓީއަށް ކަރަންޓު ފޯރުކޮށްދޭން ބޭނުންޭން ބޭނުންކުރާ 3 ޖަނަރޭޓަރުގެ ތެރެއިން 1 ޖަނަރޭޓަރު މަރާމާތުކޮށް މިހާރު ހިންގަން ފަށާފައިވާ ކަމަށާއި، ދެވަނަ ޖަނަރޭޓަރު މި ހަފްތާގެ ނިޔަލަށް މަރާމާތުކޮށް ނިންމާނެ ކަމަށް ފެނަކައިން ވިދާޅުވެފައިވެއެވެ.
ރަމަޟާން މަހަކީ ކަރަންޓު ބޭނުންކުރާ މިންވަރު އިތުރުވާ މަހަކަށްވާތީ އާއި، އައްޑޫ ސިޓީގައި ތަރައްޤީގެ އެކި މަޝްރޫއުތައް ކުރިއަށްދާތީ، ކަރަންޓުގެ ޑިމާންޑް އިތުރުވަމުންދާކަން ފާހަގަކުރެވެއެވެ. މި ކަމަށް ޚާއްޞަ ސަމާލުކަމެއް ދީގެން ފެނަކައިން ދަނީ މަސައްކަތްކުރަމުންނެވެ.
ރައީސުލްޖުމްހޫރިއްޔާ މުޢިއްޒު އިބްރާހީމްގެ ޚާއްޞަ އިރުޝާދާއި ލަފާފުޅާއެކު އައްޑޫ ސިޓީގެ ކަރަންޓަށް ދާއިމީ ހައްލު ހޯދުމަށް މަސައްކަތް ފަށައި، ދޮޅު އަހަރު ތެރޭ ޢަމަލީ މަސައްކަތް ނިންމުމަށް އަމާޒުހިފާފައިވާ ކަމަށް ފެނަކައިން ވިދާޅުވެފައިވެއެވެ. މީގެ އިތުރުން، އައްޑޫ ސިޓީގައި 32 މެގަވޮޓްގެ ޕަވަރ ހައުސްއެއް އެޅުމުގެ މަސައްކަތްވެސް ވަނީ ފަށާފައެވެ.