އާންމު ގޮތެއްގައި އެންމެ ގިނަ މީހުން ޑޮކްޓަށް ދައްކާ އެއް ސަބަބަކީ ބޮލުގައި ރިއްސުމެވެ. ދިގު މުއްދަތަކަށް ބޮލުގައި ރިއްސާ މީހުންނަކީ ގިނަ އަހަރުތަކެއް ވަންދެން އެ ވޭނަށް ފަރުވާ ނުލިބި ތަހައްމަލު ކުރަމުންދާ ބައެކެވެ. ބައެއް ފަހަރު، ބޮލުގައި ރިއްސުމަކީ ލޭމައްޗަށް ދިއުން، ސިކުނޑިއަށް ލޭއެޅުން ނުވަތަ މަދުން ނަމަވެސް، ސިކުނޑީގައި ޓިއުމަރު އުފެދުމުގެ ސަބަބުން ދިމާވާ ކަމެކެވެ. މިފަދަ ކަންތައްތައް ނޭނގި ނަމަވެސް ވަގުތު ފާއިތުވާ ފަހުން ދެނެގަނެވިފައިވެއެވެ. އެހެންކަމުން، ފަރުވާއަށްވުރެ ބަލިން ރައްކާތެރިވުން ބުއްދިވެރިވާ ފަދައިން، ކުރިޔާލައި ކަމުގެ މައުލޫމާތު ހޯދައި ރައްކާތެރިކަމުގެ ސަލާމަތީ ފިޔަވަޅުތައް އަޅަންޖެހޭނެއެވެ.
ރައްކާތެރިކަމުގެ ފިޔަވަޅުތައް
- އެކަށީގެންވާ ވަރަށް ނިދުން: ގަވާއިދުން ނިދުމުގެ އާދަ ހިފަހައްޓައި، 7-9 ގަޑިއިރު ރަނގަޅު ނިދަންވާނެ.
- ހަށިގަނޑު ސީދަލަށް ބެހެއްޓުން: ޚާއްޞަކޮށް އޮފީސް ތަންތަނުގައި ސްކްރީން ބޭނުންކުރާއިރު، މީހާ ގުދަށް އޮވެއްޖެނަމަ އޭގެ ސަބަބުން މައިބަނދާއަށް ވެސް ގެއްލުންވާނެ.
- ސްކްރީން ޓައިމް މަދުކުރުން
- ގަވާއިދުން ކެއުން: ކެއުން ދޫކޮށްލުމުން ލޭގައި ހުންނަ ހަކުރުގެ މިންވަރު ދަށްވެ، ބޮލުގެ ރިހުން އަތުވެދާނެ.
- ކެފީން މަދުކުރުން: ގިނައިން ކެފީން ބޭނުންކުރުން ނުވަތަ ކުއްލިއަކަށް ހުއްޓާލުމުން ބޮލުގެ ރިހުން އަތުވެދާނެ.
- އަޑުގަދަ ތަންތަނުގައި ގިނައިރު މަޑުނުކުރުން
- ވަރުގަދަ ވަސްތަކުން ދުރުހެލިވުން: ސެންޓު، ދުން އަދި ގަދަ ވަސްތަކަކީ ބޮލުގެ ރިހުމަށް މަގުފަހިވާކަމެއް.
ދެވިދާނެ ފަރުވާތައް
- ގިނައިން ފެން ބުއިން: ހަށިގަނޑުން ފެން މަދުވުމަކީ ބޮލުގައި ރިހުމުގެ އާންމު ސަބަބެއް، އެހެންކަމުން ދުވާލަކު މަދުވެގެން 8 ތަށި ފެން ބޯށެވެ.
- އިނގުރު ސައި: އިނގުރުގައި އިންފްލަމޭޝަން ކުޑަކުރާ ބާވަތްތައް އެކުލެވިގެންވެއެވެ. މީއީ ބޮލުގެ ރިހުމަށް ފަރުވާ ލިބިދޭ މާއްދާއެކެވެ.
- ޕެޕަމިންޓް ސައި: މި ސައި ބުއިމުގެ ސަބަބުން މަސްތަކަށް ލުއިކޮށްދީ ލޭ ދައުރުވުން ރަނގަޅުކޮށްދެއެވެ.
- ހޫނު ފެނުން ފެންވަރާލުން: މިހެން ކަންތައް ކުރުމުން ހަށިގަނޑުގެ މަސްތަކަށް ލުއިކަން ލިބި ލޭ ދައުރުވުން ރަނގަޅު ކޮށްދެއެވެ.
ނޯޓް: އިސްވެ ކިޔައިދެވިފައިވަނީ ދިގު މުއްދަތަކަށް ބޮލުގައި ރިއްސާނަމަ ދެވިދާނެ ވަގުތީ ފަރުވާތަކެވެ. ދިގު މުއްދަތަަކަށް ބޮލުގައި ރިއްސާނަމަ އެންމެ ބުއްދިވެރިވާނީ ވީހާވެސް އަވަހަކަށް ޑަކްޓަރީ ލަފާ ހޯދުމެވެ. ކަމުގެ ސީރިއަސްކަން ދެނެގަނެވި ފިޔަވަޅު އެޅޭނީ އޭރުންނެވެ.