މެލޭޝިއާގެ ބެސްޓިނެޓް ކުންފުންޏާއެކު އެކްސްޕެޓް ސިސްޓަމެއް ގާއިމުކުރުމުގެ މައްސަލައިގައި އިހުމާލުވެފައިވާތީ ކުރީ ސަރުކާރުގެ ވެރިންގެ މައްޗަށް ޖިނާއީ ތަހުގީގެއް ހިންގަން އެދޭނެކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
މިނިސްޓަރު އިހުސާންގެ މައްޗަށް ހުށަހަޅާފައިވާ އިތުބާރު ނެތްކަމުގެ މައްސަލައާ ގުޅިގެން މިއަދު ރައްޔިތުންގެ މަޖިލީހުގައި ޖަވާބުދާރީވެވަޑައިގަންނަވަމުން، މިނިސްޓަރު ވިދާޅުވީ ބެސްޓިނެޓް މައްސަލައިގައި އަހަރަކު 460 މިލިއަން ރުފިޔާ ދައްކަން ޖެހޭ ގޮތަށް އެ ކުންފުންޏާއެކު ވެފައިވާ އެއްބަސްވުން ކުރިއަށް ގެންދަން ނިންމި ނިންމުން ދިފާއުކުރައްވާ ކަމަށެވެ.
އިދިކޮޅު އެމްޑީޕީން ތުހުމަތުކުރި ގޮތުގައި ބެސްޓިނެޓްއާއެކު އެއްބަސްވުން ކުރިއަށް ގެންދަން ނިންމީ ގެއްލުންވާ ގޮތަށެވެ. ނަމަވެސް މިނިސްޓަރު އިހުސާން ވިދާޅުވީ ބެސްޓިނެޓްގެ އެކްސްޕެޓް ސިސްޓަމާއެކު އާމްދަނީ 700 މިލިއަނުން 1.3 ބިލިއަން ރުފިޔާއަށް މައްޗަށް ޖައްސާލެވޭނެ ކަމަށެވެ. އަދި 400 އަށް ވުރެ ގިނަ މިލިއަން ރުފިޔާގެ ގެއްލުން ލިބޭނެ ކަމަށް އިދިކޮޅުން ބުނިނަމަވެސް އެކަމުން ލިބޭނީ 500 މިލިއަން ރުފިޔާއަށް ވުރެ ބޮޑު ފައިދާއެއް ކަމުގައި މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ ބެސްޓިނެޓްއާއެކު ވި އެއްބަސްވުމަށް އަމަލުނުކުރާތީ އެ ކުންފުނިން 13.7 މިލިއަން ޑޮލަރުގެ ބަދަލަކަށް އެދި ކުރީ ސަރުކާރުގެ ވެރިކަމުގައި ސިޓީ ފޮނުވުމުން އެއަށް ޖަވާބުދާރީވެސް ވެފައި ނުވާ ކަމަށެވެ.