ޕީއެންސީގެ މެމްބަރުން ވޯޓު ނުލާ ކަމަށް ބުނެ މީޑިއާގައި ދެކެވޭ ވާހަކައަކީ ހަގީގަތާ ހިލާފު ވާހަކައެއް ކަމަށް އެ ޕާޓީގެ ޕާލިމެންޓްރީ ގްރޫޕްގެ ލީޑަރު އިބްރާހިމް ފަލާހު ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި ފަލާހު ވިދާޅުވެފައިވަނީ ޕީއެންސީ ޕާޓީގެ 11 މެމްބަރުން ވޯޓުގައި ބައިވެރިނުވާ ކަމަށް މީޑިއާގައި ދެކެވޭ ވާހަކައަކީ ހަގީގަތާ ހިލާފު ވާހަކައެއް ކަމަށެވެ. "އަޅުގަނޑުމެންގެ 11 މެމްބަރުންގެ ތެރެއިން 9 މެމްބަރުން މިވަގުތު އުޅުއްވަނީ ޕާޓީގެ ދަތުރުފުޅުތަކުގަ. 2 މެމްބަރުންނަށް ވޯޓުގައި ބައިވެރިނުވެވުނީ" ކަމަށް އެ ޕޯސްޓްގައި ވިދާޅުވެފައިވެއެވެ.
އިތުރަށް ފަލާހު ވިދާޅުވެފައިވަނީ އެ ދެ މެމްބަރުން ޖަލްސާއަށް ހާޒިރުވެ، ވޯޓުގައި ބައިވެރިނުވެވިފައި ވަނީ ކީއްވެތޯ ލީޑަރޝިޕުން ދަނީ ބަލަމުން ކަމަށެވެ.
ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމުގެ ބިލު މަޖިލިހުން ބަލައިގަތް
މިއަދުގެ މަޖިލިސް ޖަލްސާގައި ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމަށް ހުށަހެޅުނު ބިލުގެ ފުރަތަމަ ކިޔުން އިއްވައި، ބަހުސްކުރުމަށްފަހު ވޯޓަށް އެހުމުން، ވޯޓުގައި ބައިވެރިވި 76 މެމްބަރުންގެ ތެރެއިން 64 މެމްބަރުންގެ އަޣުލަބިއްޔަތުން ވަނީ ބިލު ބަލައިގަނެފައެވެ. މި ބިލަކީ ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދު (ސަޓޯ) އަމިއްލަ ހައިސިއްޔަތުން ހުށަހެޅުއްވި ބިލެކެވެ.
ބިލު ބަލައިގަތުމަށްފަހު، އިތުރަށް ދިރާސާކުރުމަށްޓަކައި މަޖިލީހުގެ ޖުޑިޝަރީ ކޮމިޓީއަށް ވަނީ ފޮނުވާފައެވެ