މާލެއިން ކ. މާފުއްޓަށް ދަތުރުކުރަމުންދިޔަ ދޯންޏެއް ބަންޑުން ޖަހާލައިފިއެވެ. މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ދިން މަޢުލޫމާތުގައިވާ ގޮތުން، މި ހާދިސާ ހިނގާފައިވަނީ ވައްމާފުށި އުތުރުން 0.33 ނޯޓިކަލް މޭލު ދުރުގައެވެ.
އެމްއެންޑީއެފްގެ ކޯސްޓްގާޑަށް ލިބިފައިވާ މަޢުލޫމާތުގެ މަތިން، މި ވަގުތު އެ ދޯނި ވަނީ އޮޔާދަމުންނެވެ. މި ސަބަބަށްޓަކައި، އެ ސަރަހައްދުން ދަތުރުކުރާ އުޅަނދުފަހަރުގެ ފަޅުވެރިންނަށް ވަނީ ސަމާލުވުމަށް އިލްތިމާސްކޮށްފައެވެ.
ހާދިސާ ހިނގި ވަގުތު ދޯނީގައި ތިބި ތިން މީހުން ވަނީ ފަތައިގެން ގޮސް، މާފުށި ކައިރީގައި އަޅާފައި އޮތް ސަފާރީއަކަށް އަރާފައެވެ. އެމްއެންޑީއެފް އިން ބުނީ މި ހާދިސާގައި އެއްވެސް މީހަކަށް އަނިޔާއެއް ލިބިފައިނުވާ ކަމަށެވެ.