ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު 1446 ވަނަ އަހަރުގެ ރަމަޟާން މަހުގެ ތަހުނިޔާއާއި ހެޔޮ އެދުންތައް ދިވެހި ރައްޔިތުންނަށް އަރިސްކުރައްވައިފިއެވެ.
އެކްސްޕޯސްޓެއްގައި ރައީސް ޑރ މުޢިއްޒު ވަނީ "ނިޢުމަތާއި ބަރަކާތުން ފުރިގެންވާ ރަމަޟާން މަހުގެ ތަހުނިޔާއާއި ހެޔޮ އެދުންތައް ދިވެހި ލޮބުވެތި ރައްޔިތުންނަށް އަރިސްކުރަމެވެ،" މިފަދައިން ވިދާޅުވެ، މާދަމާ ފެށޭ މި އަހަރުގެ ރޯދަ މަހުގެ ތަހުނިޔާ ދިވެހިންނަށް އަރިސްކުރައްވާފައެވެ.
ހަމަމިއާއެކު، ރައީސް ވަނީ މި މައްސަރުގެ ރޯދައާއި، ދުޢާ، އަދި ހެޔޮޢަމަލުތަކާއި ޞަދަޤާތް މާތްﷲގެ ޙަޟްރަތުން ޤަބޫލު ކުރެއްވުމަށް އެދި ދުޢާ ކުރައްވާފައެވެ. އަދި މި މައްސަރުގެ ބާއްޖަވެރިކަން އިތުރުކޮށް ދެއްވައި، އުނދަގުލާއި ދަތިތައް ބަރުދާސްކުރާ ކޮންމެ މުސްލިމް ޢާއިލާއަކަށް ރަޙްމަތާއި މަދަދު ގިނަގުނަކޮށް ދެއްވުމަށްވެސް އެދިވަޑައިގެންފައިވެއެވެ.
ޚާއްޞަކޮށް ފަލަޞްޠީނުގެ އުޚުއްވަތްތެރީންނަށް ރަޙްމަތާއި މަދަދު ގިނަގުނަކޮށް ދެއްވުމަށް އެދި ރައީސް ވަނީ ދުޢާ ކުރައްވާފައެވެ.