2024 ވަނަ އަހަރު އެކަނިވެސް 1800 އަށްވުރެ ގިނަ މީހުންގެ މައްޗަށް ދަޢުވާކުރުމަށް ކޯޓުތަކަށް ހުށަހަޅާފައިވާކަމަށް، ޕްރޮސިކިއުޓަރ ޖެނެރަލްގެ އޮފީހުން ހާމަކޮށްފި އެވެ.
ޕީޖީ އޮފީހުގެ 2024 ވަނަ އަހަރުގެ އަހަރީ ރިޕޯޓުގައި ހިމެނޭ ތަފާސްހިސާބުތަކުން ދައްކާގޮތުގައި، މިދިޔަ އަހަރު ޖުމްލަ 1851 މީހެއްގެ މައްޗަށް ދަޢުވާކުރުމަށް ކޯޓުތަކަށް ހުށަހަޅާފައިވެއެވެ.
މި މައްސަލަތަކުގެ ތެރެއިން ގިނައީ މަސްތުވާތަކެއްޗާ ގުޅުންހުރި މައްސަލަތަކެވެ. އެންމެ ގިނައިން ދަޢުވާކުރުމަށް ހުށަހަޅާފައިވަނީ ކެނެބިސް ބޭނުންކުރުމުގެ މައްސަލަތަކުގައި 269 މީހެއްގެ މައްޗަށެވެ. ދެވަނައަށް އެންމެ ގިނައިން ހުށަހަޅާފައިވަނީ ޑައިމޯފިން ބޭނުންކުރުމުގެ ކުށުގެ މައްސަލަތަކުގައި 220 މީހުންގެ މައްޗަށެވެ.
ތަޙުޤީޤީ އިދާރާތަކުގެ ތެރެއިން އެންމެ ގިނަ މައްސަލަ ހުށަހަޅާފައިވަނީ ފުލުހުންނެވެ.
ދަޢުވާކުރުމަށް ހުށަހެޅި މައްސަލަތަކުގެ ތެރެއިން
ޕީޖީ އޮފީހަށް މައްސަލަ ހުށަހެޅި ފަރާތްތައް:
* މޯލްޑިވްސް ޕޮލިސް ސަރވިސް – 876 މައްސަލަ
* އެންޓި ކޮރަޕްޝަން ކޮމިޝަން – 9 މައްސަލަ
* މޯލްޑިވްސް ކަސްޓަމްސް ސަރވިސް – 1 މައްސަލަ
* ނޭޝެނަލް އިންޓެގްރިޓީ ކޮމިޝަން – 2 މައްސަލަ
* މޯލްޑިވްސް އިންލެންޑް ރެވެނިއު އޮތޯރިޓީ – 2 މައްސަލަ
ޕީޖީ އޮފީހުގެ ފަރާތުން މިދިޔަ އަހަރު ކޯޓުތަކަށް ޖުމްލަ 1851 މީހެއްގެ މައްޗަށް ދަޢުވާކުރުމަށް ހުށަހަޅާފައިވެއެވެ. މީގެ ތެރެއިން 1464 މީހުންގެ މައްޗަށް ކޮށްފައިވާ ދަޢުވާ ހުށަހަޅާފައިވަނީ ސުޕީރިއަރ ކޯޓުތަކަށެވެ. އަދި 387 މީހެއްގެ މައްޗަށް ދަޢުވާކުރުމަށް ހުށަހަޅާފައިވަނީ މެޖިސްޓްރޭޓް ކޯޓުތަކަށެވެ.
ދަޢުވާ ހުށަހެޅި ކޯޓުތައް:
* ކްރިމިނަލް ކޯޓު – 957 މައްސަލަ
* ޑްރަގް ކޯޓު – 446 މައްސަލަ
* ޖުވެނައިލް ކޯޓު – 61 މައްސަލަ
* މެޖިސްޓްރޭޓް ކޯޓުތައް – 387 މައްސަލަ
ދަޢުވާ ލިބޭ ފަރާތްތަކުގެ ތެރޭގައި
113 އަންހެނުންނާއި
1738 ފިރިހެނުން ހިމެނެއެވެ.
18 އަހަރުން ދަށުގެ 2 ކުދިންނާއި،
18 އަހަރުން މަތީގެ 1849 މީހުން ހިމެނެއެވެ.
ޕްރޮސިކިއުޓަރ ޖެނެރަލްގެ އޮފީހުގެ ސްޕޯކްސްޕަރސަން މުޙައްމަދު ޝަރީފް ވިދާޅުވީ، “މިދިޔަ އަހަރު ވަރަށް ގިނަ މައްސަލަތަކެއް ދަޢުވާކުރުމަށް ހުށަހަޅާފައިވާކަން ފާހަގަކުރެވޭ. ޚާއްޞަކޮށް މަސްތުވާތަކެއްޗާ ގުޅުންހުރި މައްސަލަތައް އިތުރުވެފައިވާކަން ކަންބޮޑުވުމާއެކު ފާހަގަކުރަން.”
މި ރިޕޯޓުން ދައްކާގޮތުގައި، މިދިޔަ އަހަރު ހުށަހެޅުނު މައްސަލަތަކުގެ ތެރެއިން 35 މީހުންގެ މައްސަލަ ހެއްކާއި ޤަރީނާ ނެތިގެން އަނބުރާ ފޮނުވާލާފައިވާއިރު، 62 މީހުންގެ މައްސަލަ އަލުން ހުށަހެޅުމަށްޓަކައި އަނބުރާ ފޮނުވާލާފައިވެއެވެ. އަދި އިތުރަށް ކުރިއަށްގެންދިއުމުގެ މަސްލަޙަތު ނެތިގެން 32 މީހުންގެ މައްސަލަ ވަނީ އަނބުރާ ފޮނުވާލާފައެވެ.