ސައިފަތުގެ ސިއްރު: ޒުވާންކަމާއި ނަލަކަން ދަމަހައްޓާ ގުދުރަތީ ފަރުވާ: ދިވެހިންގެ ދިރިއުޅުމުގައި އެންމެ މުހިންމު އެއް ބުއިމަކީ ސައެވެ. ނަމަވެސް ގިނަ ބަޔަކަށް ނޭނގޭ ޙަޤީޤަތަކީ ސައިފަތަކީ ހަމައެކަނި ބުއިމަކަށް ބޭނުން ކުރެވޭ އެއްޗެއް ނޫން ކަމެވެ. ސައިފަތަކީ ރީތިވުމަށް ބޭނުން ކުރެވޭ އެންމެ ފައިދާ ހުރި އެއް ބާވަތެވެ
ސައިފަތުގެ ސިއްޙީ ފައިދާތައް: ސައިފަތުގައި އެކުލެވޭ އެންޓި އޮކްސިޑަންޓްސް އަދި އެންޓި އޭޖިންގ މާއްދާތަކަކީ ހަމުގެ ތާޒާކަން ދެމެހެއްޓުމަށް އެހީތެރިވެދޭ މާއްދާތަކެކެވެ. ޚާއްޞަކޮށް ގްރީން ޓީ އަދި ބްލެކް ޓީގައި ހިމެނޭ ކެފީނަކީ އޮށާޅައާ ދެކޮޅަށް މަސައްކަތްކޮށް، ޒުވާންކަން ދަމަހައްޓައިދޭ މާއްދާއެކެވެ. މީގެ އިތުރުން، ސައިފަތުގައި އެކުލެވޭ ޓެނިކް އެސިޑްގެ ސަބަބުން އިރުގެ ސަބަބުން ހަމަށް ލިބޭ ގެއްލުން ކުޑަކުރުމަށް އެހީތެރިވެދެއެވެ.
ލޮލުގެ ފަރުވާއަށް ސައިފަތް: ސައިފަތް ޕެކެޓް ފޯކޮށް ލޯމަތީގައި 5-10 މިނެޓަށް ބެހެއްޓުމުން ލޯ ދުޅަވުމާއި ލޮލުގެ ކައިރި ކަޅުވުން ހުއްޓުވައިދެއެވެ. މިއީ ވަރަށް ފަސޭހައިން ގޭގައި ތިބެގެން ކުރެވޭނެ ފަރުވާއެކެވެ. ޚާއްޞަކޮށް ގިނަ ވަގުތު ކޮމްޕިއުޓަރު ބޭނުންކުރާ ފަރާތްތަކަށް މި ފަރުވާއިން ވަރަށް ބޮޑު ތަސައްލީއެއް ލިބިގެންދާނެއެވެ. ގިނަވަގުތު ކޮމްޕިއުޓަރ ދޮށުގައި އިނުމުން ލޮލުގައި ރިއްސާ، ދުޅަވާ ގޮތްވާނަމަ، މިގޮތަށް ކަންތައް ކުރުމުން ވަރަށް އަވަހަށް ލުއި ލިބިގެންދާނެއެވެ.
ސައިފަތުގެ ސިއްރު: ޒުވާންކަމާއި ނަލަކަން ދަމަހައްޓާ ގުދުރަތީ ފަރުވާ/ ފޮޓޯ: ނެޓްމެޑްސް
މޫނުގެ ފަރުވާއަށް ސައިފަތް: ސައިފަތް ޓޯނަރެއްގެ ގޮތުގައި ބޭނުން ކުރުމުން މޫނުގައި ހުންނަ އިތުރު ތެޔޮ ފިލުވައިދެއެވެ. ބޭނުންކޮށްފައި ހުންނަ ސައިފަތް ޕެކެޓް ހިއްކާލުމަށްފަހު ސްކްރަބެއްގެ ގޮތުގައި ބޭނުން ކުރެވިދާނެއެވެ. އަދި ސައިފަތް ކައްކާފައި މޫނުގައި އުނގުޅުމުން އޮށާޅަ ނަގައި، ބިހި ނެގުމަށް މެދުވެރިވާ ޖަރާސީމުތައް މަރައި، ހަމުގެ ޕީއެޗް ލެވެލް ބެލެންސް ކޮށްދެއެވެ.
އިސްތަށިގަނޑުގެ ފަރުވާއަށް ސައިފަތް: ކަޅުސައި ފެން ބޮލަށް ސްޕްރޭ ކުރުމުން ބޮލުގެ ތަލަ ސާފުކޮށްދީ އިސްތަށިގަނޑަށް ދިރުން ގެނެސްދެއެވެ. އަދި ހީނާފަތުގެ ތެރެއަށް ސައިފަތް އެއްކޮށްލުމުން ވަގުތީ ހެއަރ ޑައި އެއްގެ ގޮތުގައި ބޭނުން ކުރެވެއެވެ. މިއީ ގުދުރަތީ ގޮތުން އިސްތަށީގެ ކުލަ ބަދަލުކުރުމަށް ބޭނުން ކުރެވިދާނެ ރައްކާތެރި ގޮތެކެވެ.
ސައިފަތުގެ ސިއްރު: ޒުވާންކަމާއި ނަލަކަން ދަމަހައްޓާ ގުދުރަތީ ފަރުވާ/ ފޮޓޯ: ނެޓްމެޑްސް
ތުންފަތުގެ ފަރުވާއަށް ސައިފަތް: ތުންފަތުން ހަން ފޮޅޭނަމަ، ގްރީން ޓީ ބޭގެއް ހޫނުފެނުގައި ފޯކޮށް ތުންފަތުގައި އުނގުޅުމުން ތުންފަތުން ދިލަ ނެގުން ހުއްޓުވައި، ތުންފަތް ޑީހައިޑްރޭޓް ވުން ހުއްޓުވައިދެއެވެ. މިއީ ޚާއްޞަކޮށް ފިނި މޫސުމުގައި ވަރަށް ބޮޑަށް ބޭނުންތެރިވާނެ ފަރުވާއެކެވެ.
ސައިފަތަކީ ހަމައެކަނި ބުއިމަކަށް ބޭނުންކުރާ އެއްޗެއްގެ ބަދަލުގައި، ރީތިވުމަށް ބޭނުންކުރެވޭ ވަރަށް ފައިދާހުރި އެއްޗެކެވެ. އެހެންކަމުން، ބޭނުންކޮށްފައި އެއްލާލާ ސައިފަތް ޕެކެޓްތައް ރީތިވުމަށް ބޭނުންކުރުމަކީ ތިމާވެއްޓާ ރައްޓެހި، އަދި އަގުހެޔޮ ގޮތެކެވެ. މިފަދަ ގުދުރަތީ ފަރުވާތައް ބޭނުންކުރުމަކީ ކެމިކަލް އެކުލެވޭ ބިއުޓީ ޕްރޮޑަކްޓްތަކުގެ ބަދަލުގައި ރަނގަޅު ހައްލެކެވެ.