ޤައުމީ އެއަރލައިން މޯލްޑިވިއަންގެ ފުރަތަމަ ވައިޑްބޮޑީ އެއަރކްރާފްޓް، އޭ330 މަތިންދާބޯޓު އިންޑިއާގެ ކޮޗިންއާއި ޓްރިވަންޑްރަމަށް ދަތުރުތަކެއް ފަށައިފިއެވެ. މި ދަތުރުތައް ފަށާފައިވަނީ މިހާރު ހިނގަމުންދާ ޗުއްޓީ މޫސުމުގައި އެ ދިމާލުތަކަށް ދަތުރުކުރާ ފަސިންޖަރުންގެ އަދަދު އިތުރުވުމާ ގުޅިގެންނެވެ.
ކޮޗިންއާއި ޓްރިވަންޑްރަމަކީ ބޭސްފަރުވާގެ ޚިދުމަތް ހޯދުމަށް ގިނަ އަދަދެއްގެ ދިވެހިން ދަތުރުކުރާ ސިޓީތަކެކެވެ. މީގެ ކުރިން މި ދެ މަންޒިލަށް ދަތުރުތައް ކުރަމުން އައީ މޯލްޑިވިއަންގެ އޭޓީއާރު 72 އަދި އެއަރބަސް އޭ320 މަރުކާގެ މަތިންދާބޯޓުތަކުންނެވެ.
މޯލްޑިވިއަން އިން ބުނީ ކުރިއަށް އޮތްތަނުގައި މި ދެ މަންޒިލަށް ދަތުރުކުރާ ފަސިންޖަރުންގެ އަދަދު އިތުރުވާނަމަ، 264 މީހުންގެ ޖާގައިގެ އޭ330 މަތިންދާބޯޓުން ޚިދުމަތް ދެމުން ގެންދާނެ ކަމަށެވެ.
މޯލްޑިވިއަންއަށް މިދިޔަ ޖެނުއަރީ މަހު ލިބުނު އޭ330 މަތިންދާ ބޯޓާއެކު، އެ އެއަރލައިނުން ވަނީ ޗައިނާގެ ތިން މަންޒިލަކަށް ސީދާ ދަތުރުތައް ފަށާފައެވެ. މީގެ އިތުރުން، ޔޫރަޕްގެ ޤައުމުތަކަށް ދަތުރުތައް ފެށުމަށްޓަކައި ވައިޑްބޮޑީގެ އިތުރު މަތިންދާބޯޓެއް ހޯދުމުގެ މަސައްކަތްވެސް މޯލްޑިވިއަންއިން ދަނީ ކުރަމުންނެވެ.