ފަތުރުވެރިކަމުގެ ދާއިރާއިން ދުނިޔޭގައި ބާއްވާ އެންމެ ބޮޑު ފެއަރ “އައިޓީބީ ބާލިން” ގައި ބައިވެރިވެވަޑައިގަތުމަށްޓަކައި ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިޤު އިބްރާހީމް މިއަދު ވަނީ ޖަރުމަނުވިލާތަށް ފުރާވަޑައިގެންފައެވެ.
މިއަހަރުގެ އައިޓީބީ ފެއަރ ބޭއްވުމަށް ހަމަޖެހިފައިވަނީ މާރިޗު 4 އިން 6 އަށް ޖަރުމަނުވިލާތުގެ ވެރިރަށް ބާލިންގައި ހުންނަ ބާލިން އެކްސްޕޯސިޓީ ސެންޓަރުގައެވެ. ފަތުރުވެރިކަމާބެހޭ ވުޒާރާއިން މަޢުލޫމާތު ދެއްވާފައިވާ ގޮތުގައި މިނިސްޓަރ ޠާރިޤުގެ މި ދަތުރުފުޅުގައި ފަތުރުވެރިކަމުގެ ދާއިރާއިން ރާއްޖެއާއި ރާއްޖޭން ބޭރުގެ އިންޑަސްޓްރީ ޕާޓްނަރުންނާއެކު މުހިންމު މަޝްވަރާތަކެއް ކުރެއްވުމަށް ވަނީ ހަމަޖެހިފައެވެ.
އައިޓީބީ ފެއަރ އަކީ ރާއްޖެއިން ކޮންމެ އަހަރަކުވެސް ޚާއްޞަ އަހައްމިއްޔަތުކަމެއް ދީގެން ބައިވެރިވާ ފެއަރއެކެވެ. މި ފެއަރގައި ރާއްޖެ ތަމްސީލުކުރުމުގެ މަސައްކަތް ކުރިއަށްގެންދަނީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަން (އެމްއެމްޕީއާރްސީ) އިން އިސްނަގައިގެން، ފަތުރުވެރިކަމުގެ ސިނާޢަތުގައި ހަރަކާތްތެރިވާ އެކި ފަރާތްތަކުގެ ބައިވެރިވުމާ އެކުގައެވެ.
ފަތުރުވެރިކަމާބެހޭ ވުޒާރާއިން ފާހަގަކުރައްވާ ގޮތުގައި އެހެން އަހަރުތަކެކޭ އެއްފަދައިން މިއަހަރުގެ ފެއަރގައިވެސް ދުނިޔޭގެ އެންމެ މަޤުބޫލު ޓޫރިސްޓް މަންޒިލުގެ ގޮތުގައި ދިވެހިރާއްޖެ އިޝްތިހާރުކުރުމުގެ މަސައްކަތް ކުރިއަށް ގެންދާނެއެވެ.
2024 ވަނަ އަހަރަކީ ރާއްޖޭގެ ފަތުރުވެރިކަމުގެ ތާރީޚުގައި ވަރަށް ކާމިޔާބު އަހަރެއްގެ ގޮތުގައި ފާހަގަކުރެވިފައިވެއެވެ. އެއީ ފުރަތަމަ ފަހަރަށް 2 މިލިޔަނަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކުރި އަހަރެވެ. މި ކާމިޔާބީއާއެކު، 2024 ވަނަ އަހަރު ސަރުކާރުން އަމާޒު ހިފާފައިވަނީ 2.3 މިލިޔަން ފަތުރުވެރިން ރާއްޖެއަށް ގެނައުމަށެވެ.