މިއަދުގެ ފަތިސްތަރީގައި މިގެނެސްދެނީ ރޯދައަށް ހުންނައިރު ދިމާވާ ވައިގެ އުނދަގޫތަކުން ސަލާމަތްވުމަށް އެޅިދާނެ ފިޔަވަޅުތަކާ ގުޅޭގޮތުން މައުލޫމާތުކޮޅެކެވެ.
ރޯދަމަހަކީ އަޅުކަމުގެ އިތުރުން ހަށިގަނޑުގެ ސިއްޙަތަށް ވަރަށް ގިނަ ފައިދާތަކެއް ލިބޭ މައްސަރެކެވެ. ނަމަވެސް ރޯދަމަހުގައި ކެއުމުގެ ވަގުތުތަކަށް އަންނަ ބަދަލުތަކާ ގުޅިގެން ބައެއް މީހުންނަށް މަތިން އެރުމާއި، މޭ އެންދުމާއި، ވައިގެ އުނދަގޫތައް ކުރިމަތިވެއެވެ. މިފަދަ އުނދަގޫތަކުން ސަލާމަތްވުމަށް އަޅަންޖެހޭ ފިޔަވަޅުތަކާއި ބެހޭގޮތުން މި ލިޔުމުގައި އަލިއަޅުވާލާނަމެވެ.
ރޯދައަށް ހުންނައިރު ދިމާވާ ވައިގެ އުނދަގޫތަކުން ސަލާމަތްވުމަށް އެޅިދާނެ ފިޔަވަޅުތައް/ ފޮޓޯ:މެޑްޓެޑް
- ކެއުމުގެ އާދަތައް ބަދަލުކުރުން: ރޯދަ ވީއްލުމަށްފަހު އެއްފަހަރާ މާގިނައިން ކެއުމަކީ މޭ އެންދުމާއި މަތިން އެރުން އިތުރުވާނެ ކަމެކެވެ. އެހެންކަމުން ރޯދަ ވީއްލުމާއި، ދެން ކާ އެއްޗެއް ކެއުމާއި، ތަރާވީޙް ނަމާދަށްފަހު ކެއުން މިގޮތަށް ތިން ބަޔަށް ބަހާލައިގެން ކެއުން މުހިންމެވެ. މީގެ އިތުރުން ކާއިރު ލަސްލަހުން ރަނގަޅަށް ކެއުމަކީވެސް ވައިގެ އުނދަގޫތަކުން ސަލާމަތްވުމަށް އެޅިދާނެ ފިޔަވަޅެކެވެ.
- ކާނާގެ ބާވަތްތައް ބަދަލުކުރުން: ތެލުގިނަ، ކުޅި އަދި ހަވާދު ގިނަ ކާނާއަކީ މޭ އެންދުމާއި ވައިގެ އުނދަގޫތައް އިތުރުކުރާ ތަކެއްޗެވެ. އެހެންކަމުން މިފަދަ ކާނާގެ ބަދަލުގައި ފައިބަރު ގިނަ، ތާޒާ މޭވާ އަދި ތަރުކާރީގެ ބާވަތްތައް ކެއުމަށް އިސްކަންދޭންވާނެއެވެ. އަދި ފެން ބޯން ވެސް ނުހަނު މުހިންމެވެ.
- ޙަރަކާތްތެރިވުން: ރޯދަ ވީއްލުމަށްފަހު އެއްތަނެއްގައި އިށީނދެ އިނުމުގެ ބަދަލުގައި ކުޑަކޮށް ހިނގާލުން ރަނގަޅެވެ. މިސާލަކަށް ހިނގާފައި މިސްކިތަށް ގޮސް މަޣްރިބު ނަމާދު ކުރުމަކީ ކުރެވިދާނެ ކަމެކެވެ. މިގޮތަށް ޙަރަކާތްތެރި ވުމުން ކާނާ ހަޖަމުވުމަށް މަގުފަހިވެ، ވައިގެ އުނދަގޫތައް ކުޑަ ވެގެން ދާނެއެވެ.
- ނިދުމުގެ އާދަތައް ބަދަލުކުރުން: ނިދާއިރު ބޯދަށަށް އިތުރު ބާލީހެއް ލައި، ބޯ ކުޑަކޮށް މައްޗަށް އުފުލައިގެން އޮތުމުން މަތިން އެރުމާއި މޭ އެންދުމުގެ އުނދަގޫ ކުޑަވެގެންދާނެއެވެ. އަދި ނިދުމުގެ ކުރިން ގަޑިއިރެއްހާއިރު ކެއުމުން ދުރުހެލިވުމަކީވެސް މުހިންމު ކަމެކެވެ.
ރޯދައަށް ހުންނައިރު ދިމާވާ ވައިގެ އުނދަގޫތަކުން ސަލާމަތްވުމަށް އެޅިދާނެ ފިޔަވަޅުތައް/ ފޮޓޯ:މެޑްޓެޑް
ރޯދަމަހުގައި މޭއެންދުމާއި ވައިގެ އުނދަގޫތަކަށް ފަރުވާއެއްގެ ގޮތުން ބޭނުންކުރެވިދާނެ ގިނަ ބުއިންތަކެއް ހުރެއެވެ. މި ބުއިންތައް ރޯދަވީއްލުމަށްފަހު ބޭނުންކުރުމުން ވަރަށް ބޮޑު ފަސޭހައެއް ލިބިގެންދާނެއެވެ.
ހަޖަމު ކުރުމަށް ފަސޭހަ ހޫނު ބުއިންތައް
ކެމޮމައިލް، ލެވެންޑަރ އަދި އިނގުރާއި މާމުއިގެ ސައި ފަދަ ހޫނު ބުއިންތަކަކީ ހަޖަމުކުރުމަށް ވަރަށް ފަސޭހަ ބުއިންތަކެކެވެ. ޚާއްޞަކޮށް އިނގުރާއި މާމުއި ސަޔަކީ ހަށިގަނޑުގެ ވަރުދެރަވުން ކުޑަކޮށްދޭ ބުއިމެކެވެ. މީގެ އިތުރުން ލިކަރިސް ރޫޓް ސަޔަކީ ވެސް ހަޖަމު ނިޒާމަށް ވަރަށް ފައިދާ ކުރާނެއެވެ.
ރޯދައަށް ހުންނައިރު ދިމާވާ ވައިގެ އުނދަގޫތަކުން ސަލާމަތްވުމަށް އެޅިދާނެ ފިޔަވަޅުތައް/ ފޮޓޯ:މެޑްޓެޑް
ފައިދާހުރި ބައެއް ޖޫސްތައް
އެސިޑް މަދު ޖޫސްތައް ބުއިމަކީ މޭއެންދުމުގެ އުނދަގޫތަކަށް ވަރަށް ފަސޭހަވާނެ ކަމެކެވެ. މިގޮތުން:
- ކެރެޓު ޖޫސް، މެލަން ޖޫސް، އަލޯވެރާ ޖޫސް
ކިރާއި ކިރުގެ ބަދަލުގައި ބޭނުންކުރެވޭ ބުއިންތައް: މަދު ސަރުބީ ހުންނަ ކިރާއި، ކިރުގެ ބަދަލުގައި ބޭނުންކުރެވޭ ބުއިންތަކަކީވެސް މޭއެންދުމުގެ އުނދަގޫތަކަށް ވަރަށް ފަސޭހަވާނެ ބުއިންތަކެކެވެ. މީގެ ތެރޭގައި:
- އަލްމަންޑް ކިރާއި ސޯޔާ ކިރު އަދި އޯޓްސް ކިރު
އެހެނިހެން ބުއިންތައް
ކުރުނބާ ފެނާއި ސްމޫތީސް ފަދަ ބުއިންތަކަކީވެސް މޭއެންދުމުގެ އުނދަގޫތަކަށް ވަރަށް ފަސޭހަވާނެ ބުއިންތަކެކެވެ. މި ބުއިންތަކުގެ ސަބަބުން މޭއެންދުމާއި ވައިގެ އުނދަގޫ ކުޑަކޮށްދެއެވެ.
ރޯދައަށް ހުންނައިރު ދިމާވާ ވައިގެ އުނދަގޫތަކުން ސަލާމަތްވުމަށް އެޅިދާނެ ފިޔަވަޅުތައް/ ފޮޓޯ:މެޑްޓެޑް
ބުއިންތައް ބޭނުންކުރުމުގައި ސަމާލުވާންޖެހޭ ބައެއް ކަންކަން:
- ގޭސް އެކުލެވޭ އަދި އެސިޑިކް ބުއިންތަކުން ދުރުހެލިވުން
- އެއްފަހަރާ ގިނަ އަދަދަކަށް ފެން ބުއިމުގެ ބަދަލުގައި މަޑުމަޑުން ބުއިން
- ކާބޮނޭޓެޑް އަދި ގޭސް އެކުލެވޭ ބުއިންތަކުން ދުރުހެލިވުން
ރޯދައަށް ހުންނައިރު ދިމާވާ ވައިގެ އުނދަގޫތަކުން ސަލާމަތްވުމަށް އެޅިދާނެ ފިޔަވަޅުތައް/ ފޮޓޯ:މެޑްޓެޑް
މޭއެންދުމާއި ވައިގެ އުނދަގޫތަކަށް ފަރުވާއެއްގެ ގޮތުން ބޭނުން ކުރެވިދާނެ ގިނަ ބުއިންތަކެއް ހުރިކަން ފާހަގަ ކުރެވެއެވެ. ނަމަވެސް މިފަދަ އުނދަގޫތައް ތަކުރާރުކޮށް ދިމާވާނަމަ، ޞިއްޙީ ފަރުވާދޭ ފަރާތެއްގެ ލަފާ ހޯދުމަކީ މުހިންމު ކަމެކެވެ. އަދި އެފަރާތްތަކުން އިރުޝާދު ދޭ ދިރިއުޅުމުގެ ވައްޓަފާޅިއަށް ގެންނަންޖެހޭ ބަދަލުތައް ގެނައުމަކީވެސް މުހިންމު ކަމެކެވެ.
ރޯދަމަހުގައި ދިމާވާ މަތިން އެރުމާއި މޭ އެންދުމުގެ އުނދަގޫތަކަކީ ކެއުމުގެ އާދަތަކަށް އަންނަ ބަދަލުތަކާ ގުޅިގެން ދިމާވާ ކަންކަމެވެ. ނަމަވެސް މަތީގައި ބަޔާންކުރެވުނު ފިޔަވަޅުތައް އެޅުމުން މިފަދަ އުނދަގޫތަކުން ސަލާމަތްވެ، އަޅުކަން އަދާކުރުމަށް ފަސޭހަވެގެންދާނެއެވެ. އަދި ހަމައެހެންމެ ރޯދަމަހުގެ ޞިއްޙީ ފައިދާތައް ފުރިހަމައަށް ލިބިގެންދާނެއެވެ.