ޔޫއެންއީޕީ އާއި މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓް ގުޅިގެން، ދިވެހިންގެ ހަށިގަނ ހަށިގަނޑުގައި މާކިއުރީ ހުރި މިންވަރު ދެނެގަތުމަށް ދިރާސާއެއް ކުރިއަށް ގެންދަން ނިންމައިފިއެވެ.
މި ދިރާސާގައި ޚާއްޞަކޮށް އަމާޒުކުރަނީ ދަރިމައިވާ އުމުރުގެ އަންހެނުންނަށެވެ.
މާކިއުރީއަކީ އިންސާނުންގެ ހަށިގަނޑަށް ވަރަށް ނުރައްކާތެރި މާއްދާއެކެވެ. ޚާއްޞަކޮށް މާބަނޑު މީހުންނާއި، ބަނޑުގައިވާ ކުދިންނަށް މީގެ ނޭދެވޭ އަސަރު ކުރެއެވެ. ދިވެހިންގެ ކާނާގައި ކަނޑުމަސް ގިނައިން ހިމެނޭތީ، މާކިއުރީ ހަށިގަނޑަށް ވަންނަ މައިގަނޑު ވަސީލަތަކީ ކަނޑުމަހެވެ.
މި ދިރާސާގައި ބައިވެރިވެވޭނީ 18 އަހަރާއި 35 އަހަރާ ދެމެދުގެ، ކ، އއ، އދ އަދި ވ އަތޮޅުގައި މަދުވެގެން 3 އަހަރު ދިރިއުޅެފައިވާ، ދުންފަތުގެ އިސްތިޢުމާލު ނުކުރާ ދިވެހި އަންހެނުންނަށެވެ. ދިރާސާގައި ބޭނުންކުރާނީ ބޮލުގެ 20 އިސްތަށިގަނޑެވެ.
މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓުން ހާމަކޮށްފައިވާ ގޮތުގައި، މި ދިރާސާގެ ނަތީޖާ އާންމުކޮށް ޝާއިޢުކުރެވުނު ނަމަވެސް ބައިވެރިންގެ އަމިއްލަ މަޢުލޫމާތު ސިއްރުކުރެވޭނެ ކަމަށެވެ.
ދިރާސާގައި ބައިވެރިވާން ޝައުޤުވެރިވާ ފަރާތްތަކުން 25 މާރިޗު 2025 ގެ ކުރިން 3018357 ނަންބަރަށް ގުޅުއްވުމަށް އެ މިނިސްޓްރީން އެދިފައިވެއެވެ.
މި ދިރާސާގެ ނަތީޖާއިން، ދިވެހިންގެ ހަށިގަނޑުގައި މާކިއުރީ ހުރި މިންވަރާއި، އޭގެ ސަބަބުން ކުރިމަތިވެދާނެ ޞިއްޙީ މައްސަލަތަކާ ބެހޭ މުހިންމު މަޢުލޫމާތު ލިބޭނެ ކަމަށް އުންމީދުކުރެވެއެވެ. މިއީ ދިވެހިރާއްޖޭގެ ތިމާވެށި ރައްކާތެރިކުރުމަށާއި، ރައްޔިތުންގެ ޞިއްޙަތު ހިމާޔަތްކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.