ހުޅުމާލޭ އަޒީޒާ މިސްކިތަށް ދިމާވެފައިވާ ކަރަންޓުގެ މައްސަލަ ހައްލުކުރުމަށް ސްޓެލްކޯގެ މެނޭޖިންގ ޑިރެކްޓަރު ހުސެއިން ފަހުމީ އަމިއްލަފުޅަށް އިސްނަންގަވައިގެން މަސައްކަތް ކުރައްވައިފިއެވެ.
މި މައްސަލައާ ގުޅިގެން ހުޅުމާލެ ސިޓީ ކައުންސިލަރު އަލީ އައިމަން މީސް މީޑިއާގައި ކުރެއްވި ޕޯސްޓެއްގައި ވިދާޅުވީ ހުޅުމާލޭ އަޒީޒާ މިސްކިތުގެ ކަރަންޓު މައްސަލައާ ގުޅިގެން އޭސީތައް ވަގުތީގޮތުން ބޭނުންކުރުން ހުއްޓާލަންޖެހިފައިވާ ކަމަށެވެ. އަދި މި މައްސަލަ ރިޕޯޓުކުރުމުން ސްޓެލްކޯގެ އެމްޑީ އަމިއްލަފުޅަށް މިސްކިތަށް ވަޑައިގެން މައްސަލަ ބައްލަވާލެއްވި ކަމަށް ވެސް އައިމަން ފާހަގަކުރެއްވިއެވެ.
"މިކަމާ ގުޅިގެން ސްޓެލްކޯއަށް ގުޅުމަށްފަހު މިސްކިތަށް ދިޔައިރު ފެނުނީ ތަފާތު މަންޒަރެއް. މަސައްކަތް ރާވާ ހިންގަން ހުންނެވީ ސްޓެލްކޯ އެމްޑީ ހުސެއިން ފަހުމީ. އެމްޑީގެ ބުރަ ޝެޑިއުލްތެރެއިން ވެސް ވަގުތު ދެއްވިކަމަށްޓަކައި ވަރަށް ބޮޑަށް ޝުކުރު އަދާކުރަން،" އައިމަން ވިދާޅުވިއެވެ.
ކައުންސިލަރު އައިމަން ހިއްސާކުރެއްވި ފޮޓޯތަކުން ފެންނަ ގޮތުގައި، ސްޓެލްކޯގެ އެމްޑީ ފަހުމީ ވަނީ އަމިއްލަފުޅަށް މިސްކިތުގެ ކަރަންޓު ބޯޑު ޗެކްކުރައްވައި، މައްސަލަ ދެނެގަތުމަށް މަސައްކަތް ކުރައްވާފައެވެ.
ފާހަގަކޮށްލެވޭ ކަމަކީ، ފަހުމީގެ ޚާއްސަ ބެއްލެވުމުގެ ދަށުން ސްޓެލްކޯއިން ގެންދަނީ، ކަރަންޓުގެ ޚިދުމަތާ ގުޅިގެން ރައްޔިތުންނަށް ދިމާވާ މިފަދަ މައްސަލަތަކަށް އަވަސް ހައްލެއް ހޯދައިދެމުންނެވެ.