ގެމަނަފުށި ކައުންސިލް ވެޓަރަންސް ފުޓްސަލް މުބާރާތުގެ ގްރޫޕް ބީގެ ފުރަތަމަ މެޗުގައި ބަންގްލަރ ޓައިގަރ އަދި ހެރަހަ ގަލާ ވާދަ ކުރި މެޗް 2 – 1 އިން ކާމިޔާބުކޮށްފިއެވެ.
ބަންގްލަރ ޓައިގަރ އަކީ އެރަށުގައި ހަރަކާތްތެރިވެ މަސައްކަތް ކުރާ ބިދޭސީންނަށް ހާއްސަ ޓީމެކެވެ. މެޗު ފަށައިގެން 2 ޓީމްގެ ފަރާތުންވެސް ފެނުނީ ދާދި ހަމަހަމަ ކުޅުމެކެވެ. މެޗުގެ ލީޑް ފުރަތަމަ ފަހަރަށް ނެގީ ބަންގްލަރ ޓައިގާސް އެވެ. އެހެން ނަމަވެސް ހެރަހަ ގަލާގެ ކުޅުން އިތުރަށް ރަނގަޅުކޮށް ވަނީ ނަތީއްޖާ ހަމަހަމަކޮށްފައެވެ.
މެޗުގެ ދެވަނަ ހާފްގައި ވެސް ފޯރިގަދަ ހަމަހަމަ ކުޅުމެއް ފެނިގެން ގޮސްފައިވެއެވެ. އަދި ބަންގްލަރ ޓައިގަރ ގެ ނުރައްކާތެރި ހަމަލާތައް ވަނީ ފެނިގެން ގޮސްފައިވެއެވެ. ނަތީއްޖާއެއްގެ ގޮތުން މެޗުގެ ފަހުވަގުތު ކޮޅުގައި ބަންގްލަ ޓައިގަރއިން ވަނީ ގޯލެއް ޖަހައި ނަތީއްޖާ 2 އަށް ބަދަލުކޮށްފައެވެ. ގޯލެއް ޖެހުމަށް ހެރަހަ ގަލާއިން ކުރިއަށް ޖެހި ކުރި މަސައްކަތް ވަނީ ނާކާމިޔާބު ވެފައެވެ. މެޗް ނިމިގެން ދިޔައީ ބަންގްލަރ ޓައިގަރ މޮޅު ވެގެންނެވެ.
މެޗުގެ މޮޅު ކުޅުންތެރިޔަކަށް ހޮވުނީ ބަންގްލަރ ޓައިގާސްގެ ޖޯޒީ ނަންބަރު 13 ޖޮއިލް އެވެ.
މި މުބާރާތުގައި މާދަމާ ރޭ ވެސް ދެ މެޗެއް ކުޅުމަށް ވަނީ ހަމަޖެހިފައެވެ. ފުރަތަމަ މެޗުގައި ވާދަ ކުރާނީ ބަރާސިލް އަދި އަތިރި އެފްސީއެވެ. ދެވަނަ މެޗުގައި އެންމެ ފަހުގެ ޗެމްޕިއަން ހުޓިކޮޑާ ނިކުންނާނީ ގއ ކޮނޑޭ ރެމްޕޭޖާއި ދެކޮޅަށެވެ.
35 އަހަރުން މަތީގެ ކުޅުންތެރިންނަށް ހުޅުވާލައިގެން ބާއްވާ ވެޓަރަންސް މުބާރާތަކީ ގއ އަތޮޅުގައި ބާއްވާ މިފަދަ ފޯރިގަދަ މުބާރާތެވެ. މި މުބާރާތުގައި 7 ޓީމަކުން ވާދަކުރާއިރު ރަށުން ބޭރުން ގއ ކޮނޑޭ ވެޓަރަންސް ޓީމް ވަނީ ބައިވެރިވެފައެވެ.
މިމުބާރާތުގެ ޗެމްޕިއަން ޓީމަށް 10000 ރުފިޔާގެ ފައިސާގެ އިނާމެއް ހުށައަޅާފައިވާއިރު ރަނަރަޕް ޓީމަށް 5000 ރުފިޔާގެ ފައިސާގެ އިނާމެއް ހުށައަޅާފައިވެއެވެ.
މި މުބާރާތުގެ މީޑިއާ ޕާޓްނަރަކީ ހުވަދޫ މީޑިއާއެވެ.