އިސްރާއީލު ޕާސްޕޯޓް ހިފައިގެން ރާއްޖެ އެތެރެވުން މަނާކުރެވޭނީ އިމިގްރޭޝަންގެ ޤާނޫނަށް ގެންނަންޖެހޭ އިސްލާހު ގެނައުމުން ކަމަށް ފޮރިން މިނިސްޓަރު ޑރ. އަބްދުﷲ ހަލީލް ވިދާޅުވެއްޖެއެވެ.
މިނިސްޓަރު މިހެން ވިދާޅުވެފައިވަނީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ލިޔުމުން ކުރެއްވި ސުވާލަކަށް ޖަވާބު ދެއްވަމުންނެވެ. މެންބަރުގެ ސުވާލުގައި ފާހަގަކުރައްވާފައިވަނީ އިސްރާއީލު ޕާސްޕޯޓާއެކު ރާއްޖެއަށް އެތެރެވުން މަނާކުރުމަށް 2 ޖޫން 2024 ގައި ނިންމި ނިންމުން އަދިވެސް ތަންފީޒު ނުވަނީ ކީއްވެގެންތޯއެވެ.
މި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ، އިސްރާއީލުގެ ޕާސްޕޯޓްގައި ދިވެހިރާއްޖެ އެތެރެވުން މަނާކުރުމަށް ވަޒީރުންގެ މަޖިލީހުން ނިންމެވި ނިންމުން ތަންފީޒު ކުރެއްވުމަށްޓަކައި އިމިގްރޭޝަންގެ ޤާނޫނަށް އިސްލާހު ގެންނަން ޖެހޭ ކަމަށެވެ. އަދި މިވަގުތު އެ އިސްލާހު އޮތީ ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241) ގައި ދިރާސާކުރުމުގެ މަރުހަލާގައި ކަމަށް ވެސް ވިދާޅުވިއެވެ.
ފޮރިން މިނިސްޓަރު އިތުރަށް ވިދާޅުވީ، އިސްރާއިލުން ފަލަސްތީނާ ދެކޮޅަށް ހިންގަމުންދާ ލާއިންސާނީ އަނިޔާތައް ސަރުކާރުން ކުށްވެރިކޮށް، އެފަދަ ކަންކަން ހުއްޓާލުމަށް ގޮވާލާ، ބައިނަލްއަޤްވާމީ މަޝްރަހުގެ ސަމާލުކަން ގެނައުމަށް އިސްލާމީ ޤައުމުތަކާއެކު ގިނަ މަސައްކަތްތަކެއް ކުރަމުންދާ ކަމަށެވެ.
އިމިގްރޭޝަން ޤާނޫނަށް ގެންނަން ހުށަހަޅާފައިވާ އިސްލާހު ފާސްވުމުން އިސްރާއީލު ޕާސްޕޯޓް ހިފައިގެން ރާއްޖެ އެތެރެވުން މަނާކުރުމުގެ ނިންމުން ތަންފީޒުކުރުމަށް މަގުފަހިވެގެންދާނެ ކަމަށް މިނިސްޓަރު ވިދާޅުވިއެވެ.