މާލެއަށް ބޯކޮށް ވާރޭވެހުމާ ގުޅިގެން ފެން ހިންދުމުގެ މަސައްކަތް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ފަށައިފިއެވެ.
ރާއްޖޭގެ ސަރަހައްދުގައި ކޮޅިގަނޑެއް އުފެދިފައިވާ ކަމަށާއި، މިއަދާއި މާދަމާ ރާއްޖޭގެ އެކި ހިސާބުތަކަށް ވިއްސާރަ ކުރާނެ ކަމަށް މޫސުމާ ބެހޭ ގައުމީ އިދާރާ (މެޓް) އިން މަޢުލޫމާތު ދީފައިވާތީ، ސިފައިން ވަނީ މި މަސައްކަތަށް ތައްޔާރުވެފައެވެ.
އެމްއެންޑީއެފްގެ ފަރާތުން މަޢުލޫމާތު ދެއްވި ގޮތުގައި، މިއަދު މެންދުރުން ފެށިގެން ޢާންމުކޮށް ފެންބޮޑުވާ ސަރަހައްދުތަކުގައި ޕަމްޕުތައް ބަހައްޓައި، ފެން ހިންދުމުގެ މަސައްކަތަށް ވަނީ ތައްޔާރުވެފައެވެ. މިހާރު މާލޭގެ ތިން ސަރަހައްދެއްގައި ޕަމްޕު ބަހައްޓައިގެން ފެން ހިންދުމުގެ މަސައްކަތް ކުރިއަށްދާ ކަމަށް އެމްއެންޑީއެފްއިން ވަނީ ބުނެފައެވެ.
މެޓް އޮފީހުން ބުނީ، މިއަދު އުތުރާއި މެދުރާއްޖެތެރޭގެ އަތޮޅުތަކަށް ގުގުރުމާއެކު ވިއްސާރަ ކުރާނެ ކަމަށް ލަފާ ކުރެވޭއިރު، ދެކުނުގެ އަތޮޅުތަކަށް ވިއްސާރަ ކުރާނެ ކަމަށެވެ. އަދި ބުދަ ދުވަހުވެސް އުތުރާއި މެދުރާއްޖެތެރޭގެ އަތޮޅުތަކަށް ގުގުރުމާއެކު ވިއްސާރަ ކުރާނެ ކަމަށާއި، ދެކުނުގެ އަތޮޅުތަކަށް ކެރީގެ އަސަރު ކުރާނެ ކަމަށް ލަފާކޮށްފައިވެއެވެ. ބުރާސްފަތި ދުވަހު މުޅި ރާއްޖެއަށް ކެރީގެ އަސަރު ކުރާނެ ކަމަށްވެސް މެޓް އޮފީހުން ވަނީ ބުނެއެވެ.
މި ހާލަތާ ގުޅިގެން، ހުރިހާ ފަރާތްތަކުންވެސް މޫސުމަށް ޚާއްޞަ ސަމާލުކަމެއް ދިނުމަށް މެޓް އޮފީހުން އިލްތިމާސްކޮށްފައިވާއިރު ސިފައިންނަކީ ރައްޔިތުންގެ ސަލާމަތާއި ރައްކާތެރިކަމަށްޓަކައި، އަޅަންޖެހޭ ކޮންމެ ފިޔަވަޅެއް އެޅުމަށް އަބަދުވެސް ތައްޔާރަށް ތިބޭ ބައެއްކަން އެމްއެންޑީއެފްއިން ވަނީ ފާހަގަކޮށްފައެވެ.