ޕޯޓް ރެސިޑަންސްގެ އެޕާޓްމަންޓެއްގައި ރޭ ރޯވި އަލިފާންގަނޑު ފެތުރުނަނުދީ ކޮންޓްރޯލުކުރުމުގައި އިސްނެގި ދެ މުވައްޒަފުންނަށް މޯލްޑިވްސް ޕޯޓ ޕޯޓްސް ލިމިޓެޑް (އެމްޕީއެލް) އިން މިއަދު ޝުކުރު އަދާކޮށްފިއެވެ.
އެމްޕީއެލްއިން ބުނެފައިވަނީ، އަލިފާނުގެ ހާދިސާ ހިނގި ވަގުތު އެ ކުންފުނީގެ ސެކިއުރިޓީ ޑިޕާޓްމަންޓްގެ ދެ މުވައްޒަފުން ކަމަށްވާ މުޙައްމަދު އައިހަމްއާއި އަޙްމަދު އާތިފް އިސްނަގައިގެން އަލިފާންގަނޑު ކޮންޓްރޯލުކޮށް ނިއްވާލުމަށް މަސައްކަތްކޮށްފައިވާ ކަމަށެވެ. މި ދެ މުވައްޒަފުންގެ ހިތްވަރާއި އަވަސް ހަރަކާތުގެ ސަބަބުން، އަލިފާންގަނޑު އިތުރަށް ފެތުރުނަނުދީ ކޮންޓްރޯލުކުރެވި، ބޮޑު ގެއްލުމެއް ކުރިމަތިވުމުގެ ކުރިން އަލިފާން ނިއްވާލެވުނު ކަމަށް އެމްޕީއެލްއިން ފާހަގަކޮށްފައިވެއެވެ.
މި ދެ މުވައްޒަފުންގެ ހިތްވަރުގަދަ މަސައްކަތުގެ އަގު ވަޒަންކުރުމުގެ ގޮތުން އެމްޕީއެލްގެ މެނޭޖްމަންޓުން މިއަދު އެ ދެ މުވައްޒަފުންނާ ބައްދަލުކޮށް، ކުންފުނީގެ މެނޭޖްމަންޓާއި މުވައްޒަފުންނާއި ޕޯޓް ރެސިޑަންސްގައި ދިރިއުޅެމުންދާ ހުރިހާ ފަރާތެއްގެ ނަމުގައި ޝުކުރު އަދާކޮށްފައިވާ ކަމަށް އެމްޕީއެލްއިން ހާމަކޮށްފައިވެއެވެ.
މީގެ އިތުރުން، އަލިފާން ނިއްވާލުމުގައި އަމަލީގޮތުން ހަރަކާތްތެރިވި ޕޯޓް ހިޔާ ކޮމެޓީގެ މެމްބަރު ނަވާޒް މުޙައްމަދު ސައީދާއި އެހެނިހެން މުވައްޒަފުން ކުރި މަސައްކަތުގެ އަގުވެސް ވަޒަންކޮށް، އެމްޕީއެލްއިން ވަނީ ޝުކުރު އަދާކޮށްފައެވެ.
އެމްޕީއެލްއިން އިތުރަށް ބުނެފައިވަނީ، ކުންފުނީގެ ހުރިހާ މުވައްޒަފުންނަކީވެސް މިފަދަ ނަމޫނާ މުވައްޒަފުންނަށް ވުމަށް ހިތްވަރުދޭ ކަމަށެވެ. މި ހާދިސާއިން ދައްކައިދެނީ އެމްޕީއެލްގެ މުވައްޒަފުންގެ ހިތްވަރާއި ޒިންމާދާރުކަމާއި، ކުއްލި ހާލަތްތަކުގައި އަވަސް ފިޔަވަޅު އެޅުމުގެ ޤާބިލުކަން ކަމަށް ކުންފުނިން ފާހަގަކޮށްފައިވެއެވެ.