މުޒާހަރާގައި ކުޑަކުދިންގެ އަބުރަށާއި ކަރާމާރަށް އުނިކަން އަންނަ ގޮތަށް މަރްޔަމް ޒުބައިރު (މަންދީ) ދެއްކި ވާހަކަ ކުށްވެރިކޮށް، އެފަދަކަންކަން ހުއްޓުވައި ފިވަޔަޅު އެޅުމަށް އެޗްއާރްސީއެމް އިން ގޮވާލައިފިއެވެ.
ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން މިއަދު ނެރުނު ނޫސްބަޔާނެއްގައި، ކުޑަކުދިންގެ ކަރާމާތަށް އުނިކަން އަންނަގޮތަށް މުޒާހަރާތަކުގައި ވާހަކަދެއްކުމަކީ ޚިޔާލުފާޅުކުރުމުގެ މިނިވަންކަމުގެ ދަށުން ހިމާޔަތްކުރެވޭ ކަމެއް ނޫންކަމަށް ވަނީ ބަޔާންކޮށްފައެވެ.
މި ބަޔާން ނެރުނީ މި މަހުގެ 12 ވަނަ ދުވަހު އިދިކޮޅު އެމްޑީޕީން ބޭއްވި މުޒާހަރާއެއްގައި ބައިވެރިއަކު ކުޑަކުއްޖެއްގެ ކަރާމާތަށް އުނިކަން އަންނަ ގޮތަށް ވާހަކަދެއްކުމާ ގުޅިގެންނެވެ.
ރައީސް ޑރ. މުހައްމަދު މުއިއްޒުގެ ދަރިކަލުންނާ ގުޅުވާ އެމްޑީޕީގެ މުޒާހަރާގައި، މީކާއިލް ނަސީމްގެ މަންްމަ މަރްޔަމް ޒުބައިރު (މަންދީ) ދެއްކި ވާހަކަ ހަރުކަށި އިބާރާތުން ކުށްވެރިކޮށް، އެޗްއާރްސީއެމް އިން ވަނީ މިފަދަ ކަންކަން ހުއްޓުވުމަށް އަޅަންޖެހށް އަޅަންޖެހޭ ފިޔަވަޅުތައް އެޅުމަށް ކަމާބެހޭ އިދާރާތަކަށް ގޮވާލާފައެވެ.
އެޗްއާރުސީއެމްގެ ބަޔާނުގައި ބުނީ، “ކުޑަކުދިންނަކީ ޤާނޫނުއަސާސީއާއި ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުން ޚާއްޞަ ރައްކާތެރިކަމެއް ލިބިދީފައިވާ ބައެކެވެ. އެހެންކަމުން، އެކުދިންގެ ކަރާމާތަށާއި އަބުރަށް އުނިކަން އަންނަ ފަދަ ގޮތަކަށް ސީދާގޮތުންވެސް އަދި ނުސީދާގޮތުންވެސް އެއްވެސް ފަރާތަކުން ޢަމަލު ނުކުރުމަށް އިލްތިމާސްކުރަމެވެ.”
މީގެއިތުރުން، އެޗްއާރުސީއެމްއިން ފާހަގަކޮށްފައިވަނީ މުޒާހަރާތަކުގައި ބައިވެރިންނާއި ފުލުހުންނާ ދެމެދު ކުރިމަތިލުންތަކެއް ހިނގައި، މުޒާހަރާގެ ބައިވެރިންނަށް އެކި ވަރުގެ އަނިޔާތައް ލިބިފައިވާކަމަށެވެ. އަދި މުޒާހަރާގެ ބައިވެރިން އަޑުގަދަކުރާ ބޭނުންކޮށްގެން މާލޭގެ މަގުތަކާއި ގްރީން ޒޯން ހިމެނޭ ސަރަޙައްދުތަކަށް ވަންނަން މަސައްކަތްކޮށްފައިވާކަމަށާއި، މިކަން ހުއްޓުވުމަށް ސަލާމަތީ ބާރުތަކުން މަސައްކަތްކޮށްފައިވާކަންވެސް ފާހަގަކޮށްފައިވެއެވެ.
އެޗްއާރުސީއެމްއިން އިލްތިމާސްކޮށްފައިވަނީ މުޒާހަރާކުރުމުގައި އާންމުންނަށާއި ޓްރެފިކަށް ދަތިނުވާނޭހެން މުޒާހަރާ އިންތިޒާމުކުރުމަށެވެ. އަދި އެއްވެ އުޅުމުގެ މިނިވަންކަމުގެ ތެރެއިން އެއްވެ އުޅުމުގައިވެސް އެކަކު އަނެކާގެ ޙައްޤުތަކަށް އުނިކަން ނާންނަފަދަގޮތަކަށް ޒިންމާދާރުކަމާއެކު ޙައްޤުގެ ބޭނުން ކުރުމަށް ގޮވާލާފައިވެއެވެ.