މި އަހަރުގެ ފިތުރު އީދާ ގުޅިގެން އެ ހަފުތާ އެއްކޮށް ސަރުކާރު ބަންދުކުރުމަށް ރައީސް ޑރ. މުހައްމަދު މުއިއްޒު ނިންމަވައިފިއެވެ.
މިއީ ރޯދަމަހުގެ ފަހު 10 ދުވަހާއެކު ޖުމުލަ 15 ދުވަހުގެ ދިގު ބަންދެއް ސަރުކާރު މުވައްޒަފުންނަށް ލިބިގެންދާނެ ނިންމުމެކެވެ.
ރައީސް އޮފީހުން މިއަދު ހާމަކުރި ގޮތުގައި، މާރިޗު 31 ވާ ހޯމަ ދުވަހަކީ ފިތުރު އީދު ދުވަސް ކަމުގައި އިސްލާމިކް މިނިސްޓްރީން ކަނޑައަޅައިފިނަމަ، އީދު ދުވަހާއި އޭގެ ފަހުގެ ދެ ދުވަހުގެ އިތުރުން އެޕްރީލް 3 ވާ ބުރާސްފަތި ދުވަސް ވެސް ސަރުކާރު ބަންދު ދުވަހެއްގެ ގޮތުގައި ހަމަޖައްސަވާފައިވެއެވެ.
އަދި މާރިޗު 30 އަކީ އީދު ދުވަސް ކަމުގައި ވާނަމަ، އީދުގެ ތިން ދުވަހުގެ އިތުރުން އެޕްރީލް 2 އަދި 3 ވެސް ބަންދު ދުވަސްތަކެއްގެ ގޮތުގައި ހަމަޖައްސަވާފައިވާ ކަމަށް ރައީސް އޮފީހުން ބުނެފައިވެއެވެ.
މި ނިންމެވުމުގެ މަޤްޞަދުގެ ގޮތުގައި ރައީސް އޮފީހުން ފާހަގަކުރައްވާފައިވަނީ، “ފިޠުރު ޢީދުގެ ބަންދާ ގުޅިގެން، ޢާއިލާއާއެކު ވީހާ ވެސް ގިނަދުވަސްތަކެއް އެކުގައި ހޭދަކުރުމަށް ފުރުޞަތު ފަހިކޮށްދިނުން” ކަމަށެވެ.
މި ނިންމެވުމާ ގުޅިގެން ސަރުކާރު އޮފީސްތައް އަލުން ހުޅުވޭނީ އެޕްރީލް 6 ވާ އާދީއްތަ ދުވަހުއެވެ.