އިދިކޮޅު އެމްޑީޕީން މާލޭގައި ބޭއްވި މުޒާހަރާގެ ތެރެއިން ކުޑަކުއްޖަކާ ގުޅޭ ގޮތުން ދެއްކި ހަގީގަތާ ޚިލާފު ވާހަކަތައް ސީރިއަސް މައްސަލައެއްގެ ގޮތުގައި ބަލަންޖެހޭ ކަމަށް ޗައިލްޑް އެބިއުސް ޕްރިވެންޝަން ސޮސައިޓީ (ކެޕްސް) އިން ބުނެފިއެވެ.
މި ފަހުން މާލޭގައި ބޭއްވި މުޒާހަރާއެއްގައި އެމްޑީޕީގެ އެކްޓިވިސްޓެއް ކަމަށްވާ މަރްޔަމް ޒުބައިރު (މަންދީ) ވަނީ ރައީސް ޑރ. މުހައްމަދު މުއިއްޒުގެ ދަރިކަލުން، އުމައިރު މުހައްމަދު މުއިއްޒާ ގުޅޭ ގޮތުން ވާހަކަތަކެއް ދައްކާފައެވެ. އަދި އޭގެ ފަހުން ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ވަނީ އެ ވާހަކަތަކަށް ހިތްވަރު ދެއްވައި "އެކްސް" ގައި ޕޯސްޓެއް ކުރައްވާފައެވެ.
މިކަމާ ގުޅިގެން ކެޕްސް ޖަމިއްޔާއިން ނެރުނު ބަޔާނުގައި ބުނެފައިވަނީ، މިއީ ހަމައެކަނި ރައީސުލްޖުމްހޫރިއްޔާގެ ދަރިކަލުންނަށް އަމާޒުކޮށް ދެއްކި ވާހަކައަކަށް ވީތީ ނެރޭ ބަޔާނެއް ނޫން ކަމަށެވެ. ނަމަވެސް އެއީ ވެސް ކުޑަކުއްޖެއް ކަމަށްވެފައި، އެ ބޭފުޅާގެ ވެސް ހައްގަކާއި އަބުރަކާއި އިއްޒަތަކާއި ކަރާމާތެއް އޮންނާނެތީ ކަމަށް ބަޔާނުގައި ފާހަގަކޮށްފައިވެއެވެ.
ކެޕްސްއިން ބުނީ މައުސޫމް ކުއްޖެއްގެ ކަރާމާތަށް އަރައިގަނެފައިވާތީ އެކަން ކުށްވެރިކުރާ ކަމަށެވެ. އަދި މިފަދަ ކަންކަމަކީ ސީރިއަސް ކުށެއްގެ ގޮތުގައި ބަލަންޖެހޭ ކަމެއް ކަމުގައި އެ ޖަމްއިއްޔާއިން ދެކޭ ކަމަށް ބުނެފައިވެއެވެ.
"މިފަދަ ކަންކަމަކީ ސީރިއަސް ކްރައިމްއެއްގެ ގޮތުގައި ބަލަން ޖެހޭ ކަމެއްކަމުގައި ދެކެން. އެހެނީ އަޅާނުލާ ދޫކޮށްލައިފިނަމަ މިހާރަށްވުރެ ބޮޑަށް މިފަދަ ބޮޑެތި ކުށްތައް އާންމު ވެގެންދާން ފުރުސަތު އޮތަތީ،" ކެޕްސްގެ ބަޔާން
"އެފަދަ ހަގީގަތެއް ނެތް ވާހަކަތައް ދެއްކުމުގެ ސަބަބުން ނަފްސާނީ ގޮތުން މިހާދިސާ ރައްދުވާ ކުއްޖާއާއި އެކުއްޖާގެ އާއިލާއަށް ވަރަށް ބޮޑަށް އަސަރުކުރާނެކަން ޔަގީން،"
މި މައްސަލައިގައި މަރްޔަމް ޒުބައިރު (މަންދީ)ގެ މައްޗަށް ކުށެއް ނެތް މައުސޫމް ކުއްޖެއްގެ އަބުރު ކަތިލައި، ކަރާމާތް ގެއްލުވާލި ކަމުގެ ދައުވާ އުފުލުމަށް ކެޕްސްއިން ގޮވާލާފައިވެއެވެ. އަދި މި މައްސަލަ ސީރިއަސް ކްރައިމެއްގެ ގޮތުގައި ބެލުމަށް ފުލުހުންނަށާއި، ދައުވާ ކުރަންޖެހޭ ފަރާތްތަކަށް ދައުވާ ކުރުމަށް އަވަސް ކޮށްދިނުމަށް ކޮމިޝަނަރ އޮފް ޕޮލިސްއަށް ގޮވާލާފައިވެއެވެ.
މީގެ އިތުރުން، މި މައްސަލައިގައި އެ ހަރަކާތް އިންތިޒާމުކުރި ފަރާތާއި، އެ ވާހަކަ ދެއްކި ފަރާތުގެ ޒިންމާދާރުކަން ކުޑަ އަމަލު އެންމެ ހަރުކަށި އިބާރާތުން ކުށްވެރިކޮށް، ޖަމްއިއްޔާގެ ހައިސިއްޔަތުން އެ މައްސަލައިގައި ތަދައްހުލްވުމަށް ވާންޖެހޭ ތައްޔާރީތައް ވެސް ވަމުންދާ ކަމަށް ކެޕްސްއިން ހާމަކޮށްފައިވެއެވެ.
އިސްލާމްދީނުގައި ވެސް ކުދިންނަކީ ޚާއްސަ އޯގާތެރިކަމެއް ދޭންޖެހޭ ބައެއްގެ ގޮތުގައި ކަނޑައަޅުއްވާފައިވާ ކަމަށާއި، ހަނގުރާމައިގައި ވެސް ކުޑަކުދިން މެރުމަކީ ކުށެއް ކަމުގައިވާއިރު، އެއިން ހާމަވަނީ ކުޑަކުދިންގެ ކަރާމާތަށް އިސްލާމްދީން ދެއްވާފައިވާ މަތިވެރި މަޤާމު ކަމަށްވެސް ކެޕްސްގެ ބަޔާނުގައި ފާހަގަކޮށްފައިވެއެވެ.