ކުޑަދަރިފުޅުގެ ބަނޑުހަރުވުން: ޙައްލު ހޯދިދާނެ
ކުޑަދަރިފުޅު ބަނޑުހަރުވުމަކީ ކޮންމެ މަންމައަކު ވެސް ބެލެނިވެރިއަކުވެސް ކަންބޮޑުވާނެ ކަމެކެވެ. ޚާއްޞަކޮށް ދަރިފުޅު ގައިގައި ވޭން އަޅާތަން ފެނުމުން މައިލަގޮނޑިއަށް ކެތެއް ނުވެއެވެ. އެެހެންކަމުން މިފަދަ ކަންތަކަށް ހައްލުހޯދާނެ ގޮތް ދެނެގަތުން މުހިންމެވެ.
ބަނޑުހަރުވުމުގެ މައިގަނޑު ސަބަބުތައް: ކުޑަކުދިންގެ ބަނޑުހަރުވުމުގެ އެންމެ މުހިންމު އެއް ސަބަބަކީ ފެން ބޮވޭ މިންވަރު މަދުވުމެވެ. ގިނަ ކުދިން ފެން ބުއިމަށް ޝައުޤުވެރިކަން ނުދައްކައެވެ. މީގެ އިތުރުން، ފައިބަރު މަދު ކާނާ ކެއުމާއި، ހަށިގަނޑަށް ބޭނުންވާ ވަރަށް ކާނާ ނުލިބުމަކީވެސް މީގެ ސަބަބުތަކެވެ.
ކާނާގެ ޒަރީއާއިން ހޯދޭނެ ޙައްލުތައް: ދަރިފުޅުގެ ބަނޑުހަރުވުން ޙައްލުކުރުމަށް ކާނާގެ ރޮނގުން އެޅިދާނެ ފިޔަވަޅުތަކުގެ ތެރޭގައި:
- ހެނދުނު ސައިގެ ކުރިން ޕްރޫންސް ނުވަތަ ކަދުރު ދިނުން
- އެވޮކާޑޯ، ފްލެކްސް ސީޑް ނުވަތަ ޗިއާ ސީޑް އެކުލެވޭ ބަނާނާ ޕޭންކޭކް
- ތަރުކާރީއާއެކު ބްރައުން ރައިސް ދިނުން
- ކިޑްނީ ބީންސް އަދި ގްރީން ޕީސް ހިމެނުން
ފެން ބުއިން އިތުރުކުރުމުގެ އުކުޅުތައް: ދަރިފުޅު ފެން ބުއިމަށް ޝައުޤުވެރިކުރުވުމަށްޓަކައި ފެނަށް މޭވާގެ ރަހަ އިތުރު ކުރެވިދާނެއެވެ. މިގޮތުން ތަފާތު މޭވާތަކުގެ ރަހަ ލެއްވިދާނެއެވެ. އަދި ޖޫސްގެ ގޮތުގައި ފަޅޯ، ދޮންކެޔޮ، އާފަލު، ދޮންކެޔޮ، ކަދުރު، ފޭރު ނުވަތަ އަލަނާސި ބޭނުންކޮށްގެން ތައްޔާރުކުރެވިދާނެއެވެ.’
ކުޑަކުދިންގެ ބަނޑުހަރުވުން: ގޭގައި ކުރެވިދާނެ ފަރުވާތައް/ފޮޓޯ:އެންސީޓީ
ދުވަހުގެ ކެއުމުގެ ތާވަލު ރޭވުން: ދަރިފުޅަށް ގަވާއިދުން ކެއުމުގެ ވަގުތުތަކެއް ހަމަޖައްސައި، ކޮންމެ ކެއުމަކަށްފަހު ބައިގަޑިއެއްހާއިރުފަހުން ފާޚާނާއަށް ގެންދިއުމަކީ މުހިންމު ކަމެކެވެ. ސްނެކްސްގެ ގޮތުގައި މޭބިސްކަދުރު، އާފަލު، ކަރާ، ޕޮޕްކޯން އަދި އާމަންޑްސް ފަދަ ތަކެތި ދެވިދާނެއެވެ.
މިބުނެދޭގޮތަށް މީރު އައިސްކްރީމް ޕުޑިންގ އެއް ތައްޔާރުކޮށްފައި ކާންދެވިދާނެއެވެ.
ދޮން އަނބާއި ދޮން ފަޅޯ އަދި ދޮންކޭލާއި ކަދުރު އަދި ކަރާކޮޅެއް ކުދިކޮށް ކޮށައި އެއަށް ގެރިކިރާއި ރޯކިރުފޮދެއް (ރޯކިރު އަޅާނީ ކުޑައެތިފޮދެއް)، ވެނީލާ ނޫނީ ސްޓްރޯބެރީ އައިސްކްރީމް(މާގިނައިން ނޫން) އަޅައި އެއްކޮށްލުމަށްފަހު ކާންދެވިދާނެއެވެ. އަދި މީގެ އިތުރުން ދޮންކޭލާއި ކަދުރު އަދި ފަޅޯ އެއްކޮށް ކުޑަފެންފޮދެއްގައި ގިރައި ފުރޭނުމަށްފަހު މާމުއިފޮދެއް އަޅައިގެން އެތިއެތިކޮޅުން ދަރިފުޅަށް ބޯން ދެވިދާނެއެވެ. ފެނާއި ފައިބަރު ގިނަ ކާނާ ކާން ދިނުމަށް ސަމާލުވާން ވާނެއެވެ.
އިތުރު އަޅާލުން: ދަރިފުޅު ފާޚާނާކުރަން އުނދަގޫވާނަމަ، ދަރިފުޅު ހިނގުވުމަށް އާދަކުރުވައި، ހެލިފެލިވެ އުޅުމަށް ބާރުއަޅައި، ހަށިގަނޑު ހަރަކާތްތެރިކޮށް ބެހެއްޓުމަކީވެސް މުހިންމު ކަމެކެވެ.
ކުޑަކުދިންގެ ބަނޑުހަރުވުން: ގޭގައި ކުރެވިދާނެ ފަރުވާތައް/ފޮޓޯ:އެންސީޓީ
ބައެއް ޙާލަތްތަކުގައި އިތުރު ސަމާލުކަމެއް ދޭންޖެހެއެވެ:
- ދެ ހަފްތާއަށްވުރެ ގިނަ ދުވަހު މައްސަލަ ދެމިގެންދާނަމަ ޑޮކްޓަރަކަށް ދެއްކުން
- ގަދަފަދަ އަލާމާތްތައް ފެނިއްޖެނަމަ ވަގުތުން ޑޮކްޓަރަކަށް ދެއްކުން
- ފާޚާނާއަށް ދިއުމުގެ އާދަ ދަސްކޮށްދިނުން ވަގުތީގޮތުން ހުއްޓާލަންޖެހިދާނެކަން ދެނެގަތުން
ކުޑަދަރިފުޅު ބަނޑުހަރުވުމަކީ ކޮންމެ މަންމައަކު ވެސް ކަންބޮޑުވާނެ ކަމެކެވެ. ޚާއްޞަކޮށް ދަރިފުޅު ރުއިމަކީ އެކަމުގެ ސަބަބުން ދަރިފުޅަށް ލިބޭ ވޭނާއި ތަދު ފެނި ހިތްދަތިވާނެ ކަމެއްމެއެވެ. ނަމަވެސް މިކަމަށް ޙައްލެއް ހޯދިދާނެއެވެ. ރަނގަޅު ކާނާ، ފެން ބުއިން އިތުރުކުރުން އަދި ގަވާއިދުން ފާޚާނާއަށް ގެންދިއުމަކީ މިކަމަށް އެޅިދާނެ މުހިންމު ފިޔަވަޅުތަކެވެ. މި ކަންކަމަށް ސަމާލުކަން ދީގެން ގިނަވެގެން ހަފްތާއެއްގެ ތެރޭގައި ދަރިފުޅުގެ ބަނޑުހަރުވުމުގެ މައްސަލައަށް ޙައްލު ލިބިގެންދާނެއެވެ.