ދިވެހިރާއްޖޭގައި ގާނޫނާ ޚިލާފަށް ސިނގިރޭޓު އުފައްދަމުން ދިޔަ ކުންފުންޏެއްގެ ވިޔަފާރި ރަޖިސްޓްރީ ބާތިލްކޮށް، އެ ކުންފުނިން އުފައްދާފައިވާ ސިނގިރޭޓުތައް ނައްތާލުމުގެ ހުއްދަ ސަރުކާރުން ދީފިއެވެ.
ފުލުހުންގެ މީޑިއާ އޮފިޝަލް ވިދާޅުވި ގޮތުގައި، މިދިޔަ ޖެނުއަރީ 30 ވަނަ ދުވަހު ހުޅުމާލޭގައި ހުރި އަމިއްލަ އޮފީހެއްގައި ސިނގިރޭޓު އުފައްދަމުންދާކަމުގެ މަޢުލޫމާތު ލިބުމާ ގުޅިގެން، ކޯޓު އަމުރެއްގެ ދަށުން އެ ތަން ބަލައި ފާސްކުރިއެވެ. މި ބަލައި ފާސްކުރުމުގައި 49,000 ސިނގިރޭޓު ފޮށި ފެނުނެވެ.
މި މައްސަލައިގައި ތުހުމަތު ކުރެވެނީ "ރޭޑިއަސް ޕްރައިވެޓް ލިމިޓެޑް" ނަމަކަށް ކިޔާ އަމިއްލަ ކުންފުންޏަކަށެވެ. އިކޮނޮމިކް މިނިސްޓްރީން ވަނީ މިހާރު މި ކުންފުނީގެ ވިޔަފާރި ކުރުމުގެ ހުއްދަ ބާތިލްކޮށްފައެވެ. އަދި ހެލްތު މިނިސްޓްރީން ވަނީ ފެނުނު ސިނގިރޭޓުތައް ނައްތާލުމުގެ ހުއްދަ ފުލުހުންނަށް ދީފައެވެ.
ދިވެހިރާއްޖޭގެ ދުންފަތް ކޮންޓްރޯލް ކުރުމާ ބެހޭ ގާނޫނުގެ ދަށުން، ރާއްޖޭގައި ދުންފަތުގެ އުފެއްދުންތައް އުފެއްދުމަކީ މަނާކަމެކެވެ. މި ގާނޫނުގެ ދަށުން، ދުންފަތުގެ އެއްވެސް ބާވަތެއް އުފެއްދުމަށް ބޭނުންކުރާ ތަކެތި އެތެރެކުރާނަމަ، އެ ތަކެތި ހިފެހެއްޓުމަށް ހެލްތު މިނިސްޓްރީން ވަނީ ކަސްޓަމްސްއަށް އަންގާފައެވެ.
މީގެ އިތުރުން، ފަހުން ގެނެވުނު އިސްލާހަކާ އެކު، ރާއްޖޭގައި ވޭޕް އެތެރެކުރުމާއި ބޭނުންކުރުން މަނާކޮށް، ސިނގިރޭޓާއި ބިޑީގެ ޑިއުޓީ 50 އިންސައްތަ އަށް ބޮޑުކުރެވިފައިވެއެވެ.