އެމްޑީޕީގެ އެއްވުމެއްގައި ކުޑަކުއްޖެއްގެ ކަރާމާތަށް އުނިކަން އަތުވެދާނެ ފަދަ ގޮތަކަށް ވާހަކަދެއްކި މަންޒަރު ބްރޯޑްކާސްޓް ކުރުމާ ގުޅިގެން، ޗިލްޑްރަންސް އޮމްބަޑްސްޕާސަންގެ އޮފީހުން ވަނީ ކަންބޮޑުވުން ފާޅުކޮށް، އެކަން ކުށްވެރިކޮށްފައެވެ.
މިދިޔަ ބުރާސްފަތި ދުވަހުގެ ރޭ އެމްޑީޕީން މާލޭގައި ބޭއްވި އެއްވުމުގައި ހިނގި މި ހާދިސާއާ ގުޅިގެން އެ އޮފީހުން ނެރުނު ބަޔާނުގައި ފާހަގަކޮށްފައިވަނީ، ޤާނޫނުއަސާސީގައި ކުޑަކުދިންނަކީ ޢާއިލާއާއި ދައުލަތުގެ ފަރާތުން ޚާއްޞަ އެހީތެރިކަމާއި ރައްކާތެރިކަން ލިބެންޖެހޭ ބައެއްކަމަށް ކަނޑައަޅާފައިވާ ކަމަށެވެ.
އެ ބަޔާނުގައި އިތުރަށް ބަޔާންކޮށްފައިވަނީ، “ކުޑަކުދިންނާ މެދު ހިންގާ މިފަދަ ޢަމަލުތަކަކީ އޭގެ ސަބަބުން އެ ކުދިންގެ އަމިއްލަ ނަފުސަށް ކުރާ އިތުބާރު ކުޑަވެ، ނަފުސާނީ ގޮތުން އެ ކުދިންނަށް ބޮޑެތި ނޭދެވޭ އަސަރުތައް ތަހައްމަލުކުރުވާ ފަދަ ކަންކަން” ކަމަށެވެ.
ކުޑަކުދިންގެ ޙައްޤުތައް ޙިމާޔަތްކުރުމުގެ ޤާނޫނުގެ ދަށުން ކުޑަކުއްޖެއްގެ އަބުރު ރައްކާތެރިކުރުމަށް މުހިންމު އުސޫލުތައް ކަނޑައަޅާފައިވާއިރު، ރާއްޖޭގައި ރަޖިސްޓްރީކޮށްގެން ހިންގާ ސިޔާސީ ޕާޓީއަކުން މިފަދަ ޢަމަލެއް ހިންގައި، އަދި ރަޖިސްޓްރީކޮށްގެން ހިންގާ މީޑިއާއަކުން އެ މަންޒަރު ދެއްކުމަކީ ކަންބޮޑުވާންޖެހޭ ކަމެއް ކަމަށް އެ އޮފީހުން ފާހަގަކޮށްފައިވެއެވެ.
މި މައްސަލައާ ގުޅިގެން ޗިލްޑްރަންސް އޮމްބަޑްސްޕާސަންގެ އޮފީހުން ވަނީ ކަމާބެހޭ އިދާރާތަކުގެ ސަމާލުކަމަށް މައްސަލަ ގެނެސް، މިފަދަ ކަންކަން ތަކުރާރުވިޔަ ނުދިނުމަށް މުޖުތަމަޢުއާއި ދައުލަތުގެ ކަމާބެހޭ އިދާރާތަކަށް އިލްތިމާސްކޮށްފައެވެ. އަދި މި މައްސަލަ ގާތުން ބަލަމުންދާ ކަމަށްވެސް އެ އޮފީހުން ބުނެފައިވެއެވެ.