މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އެކްޓިވިސްޓް މަރިޔަމް ޒުބައިރު (މަންދީ)ގެ ގަޔަށް ކަޅުތެޔޮ ޖެހުން، ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ހަރުކަށި އިބާރާތުން ކުށްވެރިކުރައްވައިފިއެވެ.
މި މައްސަލައާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައި ފަސްޓް ލޭޑީ ވިދާޅުވެފައިވަނީ "އެއްވެސް މީހަކަށް މިފަދައިން ޙަމަލާދީ އަދި އުނދަގޫކުރުމަކީ ބަލައިގަނެވޭ ކަމެއްނޫން" ކަމަށެވެ. އަދި "މިވަގުތުގައި ކަންކަން ހަލަބޮލި ނުކުރައްވާ، އިންޞާފު ޤާއިމުކުރުމަށް ޖާގަދެއްވުމަށް" އިލްތިމާސްކުރައްވާފައިވެއެވެ.
މަންދީ ބުނެފައިވަނީ، މި ހަމަލާ ދިނީ މާސްކާއި ހެލްމެޓް އަޅައިގެން ތިބި ދެ މީހަކު ސައިކަލެއްގައި އައިސް، އެމްޑީޕީ ހަރުގެއިން ނުކުމެގެން ގެއަށް ދަނިކޮށް ކަލާފާނު ހިނގުމުގައި ހުންނަ ވުޑްބެރީ ރެސްޓޯރަންޓް ކުރިމަތިން ކަމަށެވެ. މަންދީގެ އިތުރުން އެމްޑީޕީގެ އެކްޓިވިސްޓް ހުސައިން ލަމްއާންގެ ގަޔަށްވެސް ވަނީ ކަޅުތެޔޮ ޖަހާފައެވެ.
މި ހާދިސާ ހިނގާފައިވަނީ، މި މަހުގެ 12 ވަނަ ދުވަހު އެމްޑީޕީގެ މުޒާހަރާގައި މަރިޔަމް ޒުބައިރު ރައީސްގެ ދަރިކަލުންނާ ގުޅޭގޮތުން ދެއްކި ވާހަކަތަކަކާ ގުޅިގެން، އޭނާއާއި އިތުރު ދެ ފަރާތަކަށް ދައުވާކުރުމަށް ރައީސުލްޖުމްހޫރިއްޔާގެ އާއިލާއިން ނިންމާފައިވަނިކޮށެވެ. އަދި މި މައްސަލައާ ގުޅިގެން ބައެއް އިދާރާތަކުން ފުލުހުންނަށް ހުށަހަޅާފައިވާ މައްސަލަތަކުގައި މަރިޔަމް ޒުބައިރާއި އެހެން ފަރާތްތައް ފުލުހުންނަށް ހާޒިރުކުރަން ފަށާފައިވާ ދަނޑިވަޅެއްގައެވެ.
އެމްޑީޕީގެ މުޒާހަރާގައި ކުޑަކުއްޖެއްގެ ކަރާމާތް ގެއްލޭފަދަ ގޮތަކަށް ވާހަކަދެއްކި މައްސަލަ ސަރުކާރުގެ ވަޒީރުންނާއި މިނިވަން މުއައްސަސާތަކުގެ އިތުރުން، އާންމުންގެ ތެރެއިން ގިނަ ބަޔަކު ވަނީ ކުށްވެރިކޮށްފައެވެ. އަދި އެކަމުގައި ފިޔަވަޅު އެޅުމަށް ކަމާ ގުޅުންހުރި އިދާރާތަކަށް ގޮވާލާފައިވެއެވެ.