އިސްރާއީލުގެ އަސްކަރިއްޔާއިން ޣައްޒާއާ ދެކޮޅަށް ހަނގުރާމަ އަލުން ފަށައިފިކަން އިއުލާންކޮށްފިއެވެ. މިއަދު އަންގާރަ ދުވަހު އިސްރާއީލުން ޣައްޒާއަށް ދިން ވައިގެ ހަމަލާތަކުގައި މިހާތަނަށް 121 މީހުން ޝަހީދުވެފައިވާ ކަމަށް ޣައްޒާގެ ސިވިލް ޑިފެންސް އޭޖެންސީން ބުނެފިއެވެ.
އިސްރާއީލުގެ އަސްކަރީ އޮފިޝަލަކު ޣައްޒާއަށް އެއްގަމު އުޅަނދުފަހަރުން ހަމަލާދޭނެ ކަމުގެ އިންޒާރުވެސް ދީފައިވެއެވެ. އަދި މި ހަމަލާތައް ބޭނުންހާ ހިނދަކު ދެމިއޮންނާނެ ކަމަށާއި ވައިގެ ހަމަލާތަކަށް ވުރެ ވެސް ފުޅާވެގެންދާނެ ކަމަށް އެ އޮފިޝަލު ބުނެފައިވެއެވެ.
ހަމާސްގެ އިސް އޮފިޝަލަކު ރޮއިޓާސް ނިއުސް އެޖެންސީއަށް މައުލޫމާތު ދެއްވަމުން ވިދާޅުވީ އިސްރާއީލުގެ ހަމަލާތައް ފެށުމަކީ ޖެނުއަރީ މަހުގެ 19 ވަނަ ދުވަހު ފެށި ޣައްޒާގެ ހަނގުރާމަ ހުއްޓާލުމުގެ އެއްބަސްވުން ނިމުމަކަށް އައުން ކަމަށެވެ. އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ވިދާޅުވެފައިވަނީ ހަނގުރާމަ ހުއްޓާލުމުގެ އެއްބަސްވުން އިތުރަށް ދިގުދެމިގެން ދިއުމަށް މަސައްކަތްތައް ކުރިއަށް ނުދިއުމުގެ ސަބަބުން މި ހަމަލާތައް ދިނުމަށް އަމުރުކުރެއްވި ކަމަށެވެ.
މި ހަމަލާތަކާ ގުޅިގެން ޣައްޒާގެ 48،000 އަށް ވުރެ ގިނަ ފަލަސްތީނުން ޝަހީދުވެފައިވާ 17 މަސްދުވަހުގެ ހަނގުރާމަ އަލުން ފެށިގެންދާނެކަމުގެ ބިރުވެރިކަން އުފެދިފައިވެއެވެ. އަދި ހަމާސްގެ ބާރުގެ ދަށުގައިވާ އިސްރާއީލުގެ 20 އަށް ވުރެ ގިނަ މުސްލިމުއަސީރުންގެ ހާލަތާ މެދުވެސް ސުވާލު އުފެދިފައިވެއެވެ.