ގއ. ދާންދޫގައި ކީރިތި ޤުރުއާން ހިތުދަސްކުރާ ކޮންމެ ދަރިވަރަކަށް 30،000 ރުފިޔާގެ ޚާއްޞަ އިނާމެއް ދިނުމަށް އެރަށު ކައުންސިލުން ނިންމައިފިއެވެ.
މިކަން އިޢުލާންކުރެއްވީ ދާންދޫ ކައުންސިލްގެ ޤުރުއާން މުބާރާތުގެ ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ކައުންސިލްގެ ރައީސެވެ.
ކައުންސިލްގެ ރައީސް މުޙައްމަދު އާސިފް ހުވަދޫ މީޑިއާ އަށް މައުލޫމާތު ދިންގޮތުގައި، ދާންދޫގައި ޤުރުއާނުގެ ދާއިރާ ކުރިއެރުވުމަށް ގިނަގުނަ މަސައްކަތްތަކެއް ކުރަމުންދެއެވެ. މިގޮތުން، ދާއިމީކޮށް ޤުރުއާން ކިޔަވައިދިނުމަށްޓަކައި ޕާކިސްތާނުން ޚާއްޞަ ޤުރުއާން މުދައްރިސަކު ވަނީ ގެނެސްފައެވެ. އަދި ރޯދަމަސް ނިމުމަށްފަހު ކުލާސްތައް ކުރިއަށް ގެންދިއުމަށް ވަނީ ހަމަޖެހިފައެވެ.
“މި ކުލާސްތަކުގައި ބައިވެރިން ކިޔަވނީ އެއްވެސް ފީއެއް ދެއްކުމެއްނެތި ހިލޭ. އަދި ކީރިތި ޤުރުއާން ހިތުދަސްކުރާ ކޮންމެ ބައިވެރިއަކަށް 30،000 ރުފިޔާގެ ފައިސާގެ އިނާމެއް ކައުންސިލުން ދެމުން ގެންދާނެ” ކައުންސިލްގެ ރައީސް ވިދާޅުވިއެވެ.
ދާންދޫ ކައުންސިލްގެ މި މުހިންމު އިސްނެގުމަކީ ރަށުގައި ކީރިތި ޤުރުއާން ހިތުދަސް ޙާފިޒުން އުފެއްދުމަށް އަމާޒުކޮށްގެން ކުރިއަށް ގެންދާ މަސައްކަތެކެވެ. މިފަދަ ބޮޑު އިނާމެއް ކަނޑައެޅުމަކީ ދަރިވަރުންނަށް ލިބިގެންދާނެ ވަރަށް ބޮޑު ހިތްވަރެއް ކަމުގައި ބެލެވެއެވެ.
ދާންދޫ ކައުންސިލްގެ ރައީސްއަކީ ރަށާއި ރައްޔިތުންގެ ކުރިއެރުމަށް އަބަދުވެސް އިސްކަންދީގެން މަސައްކަތްކުރައްވާ ބޭފުޅެއްކަން ފާހަގަކުރެވެއެވެ. މި އިސްނެގުމަކީވެސް ރަށުގެ ދީނީ ތަރައްޤީއަށް އެޅިގެންދާނެ މުހިންމު ފިޔަވަޅެކެވެ.