ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މިއަދު މެންދުރުފަހު ތިލަފުއްޓަށް ޒިޔާރަތްކުރައްވައި، ގްރޭޓަރ މާލެ އެންވަޔަރަންމަންޓް އިމްޕްރޫވްމަންޓް އެންޑް ވޭސްޓް މެނޭޖްމަންޓް މަޝްރޫޢުގެ މަސައްކަތްތައް ކުރިއަށްދާގޮތް ބައްލަވާލައްވައިފިއެވެ.
ދެ ފިޔަވައްސަކަށް ބަހާލައިގެން ކުރިއަށްގެންދާ މި މަޝްރޫޢުގެ މައިގަނޑު އަމާޒަކީ ދިވެހިރާއްޖޭގައި ދެމެހެއްޓެނިވި ގޮތެއްގައި ކުނި މެނޭޖްކުރުމުގެ ނިޒާމެއް ގާއިމުކުރުމެވެ. އޭޝިއަން ޑިވެލޮޕްމަންޓް ބޭންކް (އޭ.ޑީ.ބީ) އާއި ޖަޕާން ފަންޑް ފޮރ ޕަވަޓީ ރިޑަކްޝަން (ޖޭ.އެފް.ޕީ.އާރު) ގެ އެހީގައި އަދި ދިވެހި ސަރުކާރުގެ ޚަރަދުގައި ކުރިއަށްގެންދާ މި މަޝްރޫޢުގެ ފުރަތަމަ ފިޔަވަހި އަމާޒުކުރެވިފައިވަނީ މާލެ ސަރަހައްދާއި އެހެނިހެން ރަށްރަށުން ކުނި ނެގުމާއި، ކުނި އުފުލައި ނައްތާލުން ޒަމާނީ ފެންވަރަށް ތަރައްގީކުރުމަށެވެ.
މަޝްރޫޢުގެ ދެވަނަ ފިޔަވަހީގައި ވޭސްޓް ޓު އެނާޖީ (ޑަބްލިއު.ޓީ.އީ) ޓެކްނޮލޮޖީ ތަޢާރަފުކޮށް، ދުވާލަކު އުފެދޭ 774 ޓަނުގެ ކުނީގެ މައްސަލައަށް ހައްލު ހޯދުމަށް ވަނީ ރޭވިފައެވެ. މި މަޝްރޫޢުގެ ތެރެއިން ތިލަފުށީ ވޭސްޓް ރިސެޕްޝަން ފެސިލިޓީއަށް ބޮޑެތި ބަދަލުތަކެއް ގެނެވި، އައު ވޭސްޓް ޓްރާންސްފަރ ސްޓޭޝަންތަކާއި، ޑިމޮލިޝަން ވޭސްޓް ޕްރޮސެސިން ޕްލާންޓެއް އަދި ބައު އުޅަނދުފަހަރު ނައްތާލުމަށް ޚާއްޞަ ޕްލާންޓެއް ތަރައްގީކުރެވޭނެއެވެ.
ރައީސުލްޖުމްހޫރިއްޔާގެ މިއަދުގެ ޒިޔާރަތުގައި ތިލަފުށީ ރީޖަނަލް ވޭސްޓް މެނޭޖްމަންޓް ފެސިލިޓީއަށް ގެނެވިފައިވާ ބަދަލުތައް ފާހަގަކުރެއްވިއެވެ. މިގޮތުން ދުވާލަކު 76 ބޭލްގެ ކުނި އުފެއްދުމުގެ މަސައްކަތް އަލުން ފެށި، ރިސޯޓްތަކުން އުފައްދާ ކުނި ޖަމާކުރާ ސަރަޙައްދަށް އުޅަނދުފަހަރު ހުސްކޮށް އަނބުރާ ފޮނުވާލަން ހޭދަވާ ވަގުތު 1 ދުވަހުން 1 ގަޑިއިރަށް ކުޑަކުރެވިފައިވާކަން ފާހަގަކުރެވުނެވެ.
މީގެއިތުރުން، ކުރިއަށް އޮތް 2 އަހަރަށް ކުނި މެނޭޖްކުރުމަށް 5000 އަކަމީޓަރުގެ އައު ވޭސްޓް ސެލްއެއް ތަރައްގީކުރެވި، ފެސިލިޓީގެ ސެކިއުރިޓީ ވަރުގަދަކުރުމަށް އެޑްވާންސް ސަވައިލަންސް ސިސްޓަމްތައް ގާއިމުކުރެވިފައިވެއެވެ.