ޤައުމީ އެއަރލައިން މޯލްޑިވިއަނުން އެތެރޭގެ އުދުހުންތަކަށް ޕްރިމިއަމް އިކޮނޮމީގެ ނަމުގައި އައު ކްލާހެއް ތަޢާރަފްކުރަން ނިންމި ނަމަވެސް، އިކޮނޮމީ ކްލާހުގެ ޓިކެޓުގެ އަގަށް އެއްވެސް ބަދަލެއް ނާންނާނެކަމަށް އެ އެއަރލައިނުން މިއަދު ހާމަކޮށްފިއެވެ.
މޯލްޑިވިއަން އިން މިހެން ބުނެފައި ވަނީ އިކޮނޮމީ ކްލާހުގެ ޓިކެޓުތައް އަގުބޮޑުވެފައިވާ ކަމަށް ބުނެ ގިނަ ފަރާތްތަކަކުން ސޯޝަލް މީޑިއާގައި ކަންބޮޑުވުން ފާޅުކުރަމުން ދިޔުމާ ގުޅިގެންނެވެ.
މޯލްޑިވިއަނުން ވަނީ އޭޕްރިލް 13 އިން ފެށިގެން އެތެރޭގެ އުދުހުންތަކުގައި ޕްރިމިއަމް އިކޮނޮމީ ކްލާހެއް ތަޢާރަފްކުރުމަށް ނިންމާފައެވެ.
ޕްރިމިއަމް އިކޮނޮމީ ކްލާހުގެ ފަސިންޖަރުންނަށް ލިބޭ ޚާއްޞަ ޚިދުމަތްތަކުގެ ތެރޭގައި 25 ކިލޯގެ ބެގެޖް އެލަވަންސަކާއި، އިތުރު ފީއަކާ ނުލައި ފުރާ ދުވަސް އެއްފަހަރު ބަދަލުކުރުމުގެ ފުރުޞަތު ހިމެނެއެވެ. މީގެ އިތުރުން ޚާއްޞަ ސީޓުތަކަކާއި، ފްލައިޓުގައި ލުއިކެއުމާއި ބުއިން ލިބޭނެއެވެ.
އެއަރޕޯޓުގެ ޚިދުމަތްތަކުގައިވެސް ޕްރިމިއަމް އިކޮނޮމީ ފަސިންޖަރުންނަށް އިތުރު ލުއިފަސޭހަތަކެއް ލިބިގެންދާނެއެވެ. މީގެ ތެރޭގައި ޗެކިން އަދި ބޯޑިންގައި އިސްކަންދިނުމާއި، މާލެ، ދަރަވަންދޫ އަދި އިފުރު އެއަރޕޯޓުތަކުގައި ލައުންޖްގެ ޚިދުމަތް ލިބުން ހިމެނެއެވެ.
މޯލްޑިވިއަނުން ވިދާޅުވެފައިވާ ގޮތުގައި މި އައު ކްލާހަށް ޓިކެޓް ވިއްކަން މިހާރު ވަނީ ފަށާފައެވެ. އަދި އެ އެއަރލައިންގެ ވެބްސައިޓާއި މޯބައިލް އެޕްގެ އިތުރުން އެހެނިހެން ބުކިންގ ޗެނަލްތައް މެދުވެރިކޮށް ޕްރިމިއަމް އިކޮނޮމީ ކްލާހުގެ ޓިކެޓް ގަނެވޭނެއެވެ.