ކ. ހިންމަފުށީ ކައުންސިލް އިދާރާއަށް ވިއްސާރައިގައި ލިބެމުންދާ ގެއްލުންތަކާ ގުޅިގެން އެ އިދާރާގެ ހިންގުން ވަގުތީގޮތުން އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އޮފީސް އިމާރާތަށް ބަދަލުކޮށްފިއެވެ.
ކައުންސިލުން މައުލޫމާތު ދެއްވިގޮތުގައި ކުރަމުން އަންނަ ވިއްސާރަތަކުގައި އެކި ފަހަރު މަތިން ކައުންސިލް އިދާރާ އެތެރެއަށް ފެންވަދެ، އިދާރާގެ މުދަލަށާއި ލިޔެކިޔުންތަކަށް ފޫނުބެއްދޭފަދަ ބޮޑެތި ގެއްލުންތަކެއް ވަނީ ލިބިފައެވެ. މިކަމާ ގުޅިގެން ކައުންސިލްގެ 4 ވަނަ ދައުރުގެ 212 ވަނަ ޖަލްސާއިން ވަނީ މާރިޗު 20، 2025 އިން ފެށިގެން އިދާރާގެ ހިންގުން އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އޮފީސް އިމާރާތަށް ބަދަލުކުރުމަށް ނިންމާފައެވެ.
ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވަނީ ކޮންޓްރެކްޓާ ފައިނޭންސް އުސޫލުން 55 ރަށެއްގެ ކައުންސިލްގެ އިދާރާ އިމާރާތް އެޅުމުގެ އަމަލީ މަސައްކަތް އަންނަ އޭޕްރީލް މަހުގައި ފަށާނެ ކަމަށް ވިދާޅުވެފައެވެ.
ވަޒީރުގެ މައުލޫމާތުގައި، މި މަޝްރޫއުގެ ދަށުން 39 ކައުންސިލް އިދާރާ ދެ ބުރިއަށް އެޅުމަށް ވަނީ ނިންމާފައެވެ. އަދި މަދު އަދަދެއްގެ ކައުންސިލް އިމާރާތްތައް އެއްކޮށް ތަޅާލައި އަލުން އަޅަން ޖެހޭއިރު، އެހެން ރަށްތަކުގެ ކައުންސިލް އިމާރާތްތައް ތަރައްޤީކޮށް ޖާގައިގެ ދަތިކަން ހައްލުކުރެވޭނެއެވެ.