މާލޭ ސަރަހައްދުގެ ހަތަރު ތަނެއްގައި ބޮޑު ޖަމާއަތުގައި ފިތުރު އީދު ނަމާދު ކުރާނެކަން އިސްލާމީ ކަންތައްތަކާއި ބެހޭ ވުޒާރާއިން ރޭ ހާމަކޮށްފިއެވެ. މިކަން އެ ވުޒާރާއިން ހާމަކޮށްފައިވަނީ ދިވެހި ސަރުކާރުގެ ގެޒެޓްގައި ޝާއިޢުކުރި އިޢުލާނެއްގައެވެ.
އިޢުލާނުގައިވާ ގޮތުން، މާލޭގައި ބޮޑު ޖަމާއަތުގައި އީދު ނަމާދު ކުރިއަށް ގެންދިއުމަށް ހަމަޖެހިފައިވަނީ މާފަންނު ސްޓޭޑިއަމްގައެވެ. ވިލިނގިލީގައި ބޮޑު ޖަމާއަތުގައި އީދު ނަމާދު ކުރުމަށް ހަމަޖެހިފައިވަނީ ބޯޅަދަނޑުގައެވެ. ހުޅުމާލެ ފޭސް 1 ގައި ސިންތަޓިކް ޓްރެކްގައި އަދި ފޭސް 2 ގައި ކްރިކެޓް ސްޓޭޑިއަމްގައި އީދު ނަމާދު ކުރިއަށް ގެންދެވޭނެއެވެ.
މީގެ އިތުރުން، މާލެ ސަރަހައްދުގެ 23 މިސްކިތެއްގައި ފިތުރު އީދު ނަމާދު ކުރެވޭނެ ކަމަށް އިސްލާމިކް މިނިސްޓްރީން ވަނީ ހާމަކޮށްފައެވެ.
އިސްލާމިކް މިނިސްޓްރީން ވަނީ ވިއްސާރަވެއްޖެ ހާލަތެއްގައި އަމަލުކުރާނެ ގޮތްވެސް ހާމަކޮށްފައެވެ. އެގޮތުން، “ވިއްސާރަވުމުގެ ސަބަބުން މައިދާންތަކުގައި ކުރުމަށް ހަމަޖެހިފައިވާ އީދު ނަމާދުގެ ބޮޑު ޖަމާއަތް ކެންސަލްވެއްޖެނަމަ، އީދު ނަމާދު ކުރާނީ މާލެ ސިޓީގެ ހުކުރު ނަމާދުކުރާ ހުރިހާ މިސްކިތެއްގައި” ކަމަށް އެ ވުޒާރާއިން ބުނެފައިވެއެވެ.