މި ވެރިކަން ފެށުނު އިރު ގިނަ ކަންތައްތަކެއް އޮތީ އޮޅުން ބޮޅުން ވެފައި ކަމަށާއި ނަމަވެސް ރައީސް ޑރ. މުހައްމަދު މުއިއްޒު މަސައްކަތްޕުޅުން ހުރިހާ ކަމެއް ހަމައަކަށް އެޅެމުން އަންނަ ކަމަށް އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.
ހއ. އުތީމުގައި އޭޓީއެމްގެ ހިދުމަތް ފައްޓަވައިދެއްވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ސައީދު ވިދާޅުވީ، ރައީސް ޑރ މުއިއްޒު ރައްޔިތުންނަށް އެހީތެރިވެވަޑައިގެންނެވުމަށް ވަރަށް ގިނަ މަސައްކަތްތަކެއް ކުރައްވާ ކަމަށެވެ. ގައުމުގެ ހާލަތު އޮތީ އަނދިރި ދަތި ދަނޑިވަޅެއްގައި ކަމަށާއި އެކަންކަން ރަނގަޅުކޮށް، ދަރަނިކަން މިންޖުވުމަށް ރައީސް ރެއާދުވާ އެއްކުރައްވައިގެން މަސައްކަތްކުރައްވާ ކަމަށް ވަަޒީރު ވަނީ ވިދާޅުވެފައެވެ.
“އެ މަނިކުފާނު ވެރިކަމާ ހަވާލުވެވަޑައިގެންނެވި އިރު މުޅިން އޮޅުން ބޮޅުން އަރާފައި ހުރީ. މުޅި ރާއްޖެ އޮތީ ދަރަނީގެ ދަންތުރައެއްގައި ވަރަށް ބޮޑަށް ގޯސްވެ، ދެންމެ ދެންމެ ދަރާ ވިކިދާނެ ހާލަތެއްގައި، މާތްﷲގެ ތަނަވަސް ވާގިފުޅާ އެކު ރައީސް މުއިއްޒުގެ ލީޑާޝިޕްގައި މި ރާއްޖެ މި ކުރި ދަތުރުގައި، ކުރަމުން މި އަންނަ ދަތުރުގައި، އެ މައްސަލަތައް ހައްލު ކުރައްވަމުން، މިހާރު އެ މަނިކުފާނު އެ ގެންދަވަނީ ރައްޔިތުންނަށް ބޭނުންވާ މުހިއްމު ވަސީލަތްތައް ވަރަށް ބާރު ސްޕީޑުގައި ގެނެސްދެއްވަމުން،” ވަޒީރު ސައީދު
ރައްޔިތުންނަށް ބޭނުންވާ މުހިންމު ހިދުމަތްތައް ފޯރުކޮށްދިނުމަށް ރައީސް ވަރަށް ހާއްސަ ސަމާލުކަމެއް ދެއްވާ ކަމަށާއި، އެފަދަ މަސައްކަތްތައް ވަރަށް ބާރު ދުވެލީގައި ކުރިއަށް ގެންދަވަމުން އަންނަ ކަމަށް މިނިސްޓަރ ވަނީ ފާހަގަކުރައްވާފައެވެ.
ވަޒީރުސައީދު ވިދާޅުވީ ކުދި ރަށްރަށުގައި އޭޓީއެމް ބެހެއްޓިދާނެ ކަމަށް މީގެ ކުރިން ރައްޔިތުން ގަބޫލު ނުކުރި ނަމަވެސް، މިހާރު ސަރުކާރުން ދަނީ ކުޑަ ރަށެއް ބޮޑު ރަށެއް ތަފާތުކުރުމެއް ނެތި މިކަން ކުރައްވަމުން ކަމަށެވެ. އަދި މިއީ ރައްޔިތުންނަށް ލިބޭނެ ބޮޑު ފަސޭހައެއް ކަމަށްވެސް މިނިސްޓަރ ފާހަގަކުރެއްވިއެވެ.
ފާހަގަކޮށްލެވޭ ކަމަކީ، މިއަހަރު ނިމުމުގެ ކުރިން ރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓީއެމް ބެހެއްޓުމަށް ސަރުކާރުން މަސައްކަތް ކުރަމުންދާކަމެވެ