ރަމަޟާން މަހުގެ ފަހު ދިހައެއްގެ ދުވަސްތަކުގައި މަސްޖިދުލް ޙަރާމަށް މީހުން ގިނަވެ ބާރުބޮޑުވާ ވަގުތުތަކުގައި ކުޑަކުދިން ނުގެންދިއުމަށް ސަޢުދީ ޢަރަބިއްޔާގެ ދާޚިލީ ވުޒާރާއިން އިލްތިމާސްކޮށްފިއެވެ.
ކޮންމެ އަހަރެއްގެ ރަމަޟާން މަހުގައިވެސް، ޚާއްޞަކޮށް ފަހު ދިހައެއްގެ ރޭތަކުގައި މަސްޖިދުލް ޙަރާމަށް ޒިޔާރަތްކޮށް ޢުމްރާކުރާ މީހުންގެ އަދަދު އާދަޔާ ޚިލާފަށް އިތުރުވެއެވެ. މި ދުވަސްވަރަކީ މުޅި އަހަރުގެ ތެރެއިން އެންމެ ގިނަ އަދަދެއްގެ މީހުން ޢުމްރާގެ އަޅުކަން ފުރިހަމަކުރާ މޫސުމެވެ.
ސަޢުދީ ދާޚިލީ ވުޒާރާއިން ބުނީ، “މިސްކިތުގައި އަޅުކަންކުރާ އެންމެންގެ ސަލާމަތާއި ރައްކާތެރިކަން ޔަޤީންކުރުމަށްޓަކައި މި ފިޔަވަޅު އަޅަން ޖެހުނީ” ކަމަށެވެ. އަދި މިސްކިތުގެ ސަލާމަތީ ކަންކަން ކަށަވަރުކުރުމަށް ކަނޑައަޅާފައިވާ އުސޫލުތަކާ އެއްގޮތަށް ޢަމަލުކުރުމަކީ މުހިންމު ކަމެއްކަން ފާހަގަކޮށްފައިވެއެވެ.
ދެ ޙަރަމް ބަލަހައްޓާ އިދާރާއިން ވަނީ މައިންބަފައިންނަށް އެހީތެރިވުމުގެ ގޮތުން 24 ގަޑިއިރު ހިދުމަތްދޭ ޑޭ ކެއަރ ސެންޓަރުތަކެއް ޤާއިމުކޮށްފައިވާ ކަމަށް ބުނެފައެވެ. މި ސެންޓަރުތަކަކީ ކުޑަކުދިންނަށް ރައްކާތެރި މާހައުލެއްކަމަށާއި، މައިންބަފައިން އަޅުކަންކުރާ ވަގުތު ކުދިންގެ ކަންތައްތައް ފުރިހަމައަށް ބަލަހައްޓައިދޭނެކަމުގެ ޔަޤީންކަން އެ އިދާރާއިން ދީފައިވެއެވެ.
މި އިލްތިމާސްއާއެކު، އަޅުކަންކުރާ އެންމެންނަށް ފަސޭހަކަމާއެކު އަޅުކަން ކުރެވޭނެ މާހައުލެއް ޤާއިމުކުރުމަށް ސަޢުދީ ސަރުކާރުން މަސައްކަތްކުރަމުންދާކަން ފާހަގަކުރެވެއެވެ.